Энг оғир, энг салобатли дзюдочимизни табриклаймиз!

Бекмурод Олтибоев 1996 йилнинг 17 июнь куни Сурхондарё вилоятининг Шўрчи туманида дунёга келган. Полвонлар юртидан бўлгани учун ёшлигидан миллий қадриятимизнинг бир бўлаги ҳисобланган кураш билан ошно тутинди. Кейинчалик эса дзюдога ўтди ва мураббийи Олим ака қўл остида шуғулланишни бошлади. 

+100 кг вазн тоифасидаги дзюдочимиз 2015 ва 2016 йилларда икки бор ёшлар ўртасидаги Осиё чемпионатининг кумуш медалини қўлга киритди. 2018 йил Индонезиянинг Жакарта шаҳрида ўтказилган 18-Осиё ўйинларининг бронза медали совриндори. 2018 ва 2019 йилги Тошкент Гран-Присида кумуш, 2017 йилда айнан шу мусобақада бронза медалига сазовор бўлган. 2018 йил Хохот Гран-Присида ҳам бронза медали билан тақдирланган. Икки бор ёшлар ўртасида Осиё Кубоги ғолибига айланган. Катталар ўртасидаги жаҳон чемпионати иштирокчиси. 2018 йил Бокуда кучли бешликдан жой олган.        

Тақдирни қарангки, туғилган кунидан бир кун олдин, яъни кеча автомобил салонидан янги "Жентра" чиқди. Албатта, бу Бекмурод Олтибоев учун туғилган кунига ажойиб совға бўлди. Машинасининг тагидан шамол ўтиб турсин, деб ният қиламиз. Абдулла Тангриевнинг издоши сифатида қаралаётган Бекмурод полвоннинг ҳали ғалабали онлари олдинда. У айни пайтда Токио-2020 Олимпиадаси рейтингида йўлланмалар зонасида турибди.

Фурсатдан фойдаланиб, Ўзбекистон дзюдо федерацияси раҳбарияти, мураббийлар штаби, дзюдочилар, дўстлари номидан Бекмурод Олтибоевни бугунги таваллуд айёми билан муборакбод этамиз. 

Туғилган кун муборак, БЕКМУРОД!