Эшитдик-да! Топ-100`таликдаги икки рус теннисчиси маҳаллийлаштирилиши мумкин

Рус теннис маликаларининг исм-шарифлари ошкор қилинмаяпти, лекин уларнинг WTA рейтингида Топ-100`таликдан жой олгани айтилмоқда. 

Топ-100 рейтингидан жой олган россияликлар: Мирра Андреева (5-ўрин), Екатерина Александрова (11), Диана Шнайдер (19), Людмила Самсонова, Анна Калинская (29), Вероника Кудерметова (30), Анастасия Павлюченкова (49), Анастасия Потапова (59), Анна Блинкова (71), Полина Кудерметова (76), Анастасия Захарова (87), Камила Раҳимова (89).

Шу йил "Пахтакор" клубининг собиқ раҳбари, пойтахтимиз рамзи ҳисобланган "Ўзбекистон" меҳмонхонаси эгаси, "Капиталбанк" асосчиси, таниқли тадбиркор Ботир Раҳимов Ўзбекистон теннис федерацияси раиси этиб сайланганди. 

Табиийки, янги раҳбар, бўлиб ҳам спорт оламига бегона бўлмаган Раҳимовдан катта ўзгаришлар кутилади. Ўзбек теннисининг ҳозирги ҳолати ачинарли. ATP ва WTA турнирларидаги иштирок ҳақида гап-сўз бўлиши мумкин эмас, ҳатто М15 тоифасига кирувчи майда мусобақаларда ҳам теннисчиларимиз муваффақиятга эриша олишмаяпти. Денис Истоминдан кейин Олимпиада орзуси ҳам "кўмилди". Рейтингдаги энг яхши ўрнимиз Ҳумоюн Султоновга тегишли  - 400-поғона. 

Ҳозирги раҳбарият олдига катта эҳтимол билан айнан Олимпиадага йўлланма олиш вазифаси қўйилган. Вазиатга реал қарасак, бугунги терма жамоамиз теннисчилари билан бу вазифани уддалаш мушкул масала. Теннисда Олимпиада-2028`га илк йўлланмани Осиё ўйинлари тақдим этади. Бу мусобақа 2026 йилда Японияда бўлиб ўтишини инобатга олсак, россиялик теннис маликаларига Ўзбекистон фуқаролиги берилиши ҳақиқатга яқин экани ойдинлашади. 

Ёдингизда бўлса, Денис Истомин 2018 йили Индонезияда ўтган 18-Осиё ўйинларининг яккалик баҳсларида чемпион бўлиш орқали Токио-2020 Олимпиадаси лицензиясини қўлга киритган эди. Билишимизча, ҳозирча россиялик аёл теннисчиларга спорт фуқаролиги бериш бўйича иш кетаётгани тешик қулоққа чалинди. Дэвис Кубогида Гонконгга имконият бой берилганидан кейин эркак теннисчилар масаласи ҳам кун тартибига чиққан бўлиши мумкин. Буларнинг бари ҳозирча норасмий хабарлар.  

"Бизда маълум бир вазият бор: Россияда мусобақалар, бадал пуллари йўқ, Лигалар ишламаяпти. Бунинг натижасида биз захираларни молиялаштира олмаймиз. Бизда мингга яқин теннисчи чет элда ўйнайди, одамлар бошқа мамлакатлар учун ўйнаш учун кетиши табиий ҳол. Ҳозир камида 20 теннисчимиз фуқаролигини ўзгартириши мумкин", - деди Россия теннис федерация президенти 77 ёшли Шамил Тарпишев.

Маълумот учун, ўтган йили россиялик собиқ теннисчи Элина Аванесян Арманистон байроғи остига ўтди, Александр Шевченко эса спорт фуқаролигини Қозоғистонга ўзгартирди. Яқинда эса Дарья Касаткина Австралия фуқаролигини қабул қилди.  

Эслатиб ўтамиз, 2022 йилда Халқаро теннис федерацияси (ITF) Халқаро олимпия қўмитаси (ХОҚ) тавсиялари фонида Россия ва Беларусь теннис федерациялари аъзолигини тўхтатган ва ташкилот шафелигида ушбу мамлакатлардаги барча турнирларни бекор қилганди. Бу мамлакатлар терма жамоалари норасмий жаҳон чемпионати ҳисобланган Дэвис Кубоги ва Билли Жин Кинг Кубогида иштирок эта олмайди.