Файзиев Туркиядаги турнир чемпионига айланди

"M 15 Antalya" турнирида теннисчимиз Санжар Файзиев ҳам иштирок этаётгани ҳақида хабар берган эдик. Гарчи Файзиев яккалик баҳсларида мусобақани эрта тарк этган бўлсада, жуфтлик беллашувларида муваффақиятли иштирок эта олди. 

Файзиев ва грециялик Маркос Каловелонис жуфтлиги италиялик Александр Вайс ҳамда аргентиналик Ҳуан Пабло Пас жуфтлигига қарши ярим финал учрашувида кортга чиқди. 1 соату 45 дақиқа давом этган учрашувда Файзиев/Каловелонис тандеми 7/5, 7/6 ҳисобида рақибларини мағлубиятга учратиб, финалга йўл олди.

Шу куннинг ўзида финал учрашуви ҳам бўлиб ўтди. Финалда бу тандемга болгариялик Габриел Донев ва руминиялик Влад Андрел Данcу рақиблик қилди.

1 соату 43 дақиқа давом этган муросасиз учрашувда Файзиев/ Каловелонис жуфтлиги 5/7, 7/6, 10/7 ҳисобида ғалаба қозониб, турнир чемпионига айланишди.