FIDE Рапид ва Блиц Жаҳон чемпионати. Нодирбекдан кейин Синдаров ва Ҳамдамова ҳам чемпионлик пойгасига қўшилди + ФОТО

Ушбу нуфузли мусобақада дунёнинг 70 давлатидан келган 394 нафар шахматчи иштирок этяпти. Ўзбекистон терма жамоаси 14 нафар етакчи спортчи билан баҳсларга киришган. 

Мусобақанинг Рапид бўйича иккинчи куни иштирокчилар 4 та турда ўзаро дона суришди. Шахматчиларимиз орасида энг яхши натижага Нодирбек Абдусатторов, Жавоҳир Синдаров, Афруза Ҳамдамова ва Гулруҳбегим Тоҳиржонова эга бўлиб турибди.

Хабар берганимиздек, кечаги баҳсларда Нодирбек Абдусатторов 4 та партиядан 3 тасида ғалаба ва 1 тасида дуранг натижа қайд этди. 9-турда қора доналарда ўйнаганига қарамай, амалдаги жаҳон чемпиони ҳиндистонлик Гукеш Доммараджуни чиройли тарзда мағлубиятга учратди. Бу билан Нодирбек 9 имкониятдан 7 очко жамғариб, қўшимча кўрсаткичларга кўра 6-ўринга кўтарилиб олди. Абдусатторов биринчи кунни 3,5 очко билан 55-ўринда якунлаган эди. 

Яқиндагина Жаҳон кубогини қўлга киритган Жавоҳир Синдаров ҳам пешқадамлар сафига яқинлашиб олди. У 9 имкониятдан 6,5 очко жамғариб, қўшимча кўрсаткичларга кўра 12-ўринни банд этган. Еттинчи поғонадаги Максим Вашье-Лаграв ҳисобида ҳам Синдаров сингари 6,5 очко бор. Яна бир гроссмейстеримиз Муҳиддин Мадаминов 5,5 очко тўплаган. Нодирбек Якуббоев 5,5 очко билан биринчи кунги 173-поғонасидан роппа-роса 100 ўрин кўтарилиб олди - 73!

Аёллар ўртасидаги рапид баҳсларида ҳамюртларимиздан Афруза Ҳамдамова ва Гулруҳбегим Тоҳиржонова муваффақиятли одимламоқда. Ҳар икки шахматчимиз кеча ўтказилган сўнгги 8-турда жаҳон чемпионларини мағлубиятга учрата олди. Ҳамдамова қора доналарда ўйнаганига қарамай, блиц бўйича икки карра жаҳо чемпиони, россиялик Валентина Гунинани, Тоҳиржонова оқ доналарда грузиялик жаҳон чемпиони Белла Хотенашвилини таслим этди. 

Бугун ўтказиладиган рапид баҳсларининг сўнгги куни олдидан Афруза Ҳамдамова 6 очко билан қўшимча кўрсаткичларга кўра 12-ўриндан жой олган. Учинчи ўриндаги Александра Горячкина ҳисобида ҳам 6 очко бор. Вакиламиз биринчи кунги баҳслардан сўнг 22-поғонада бораётганди. Гулруҳбегим Тохиржонова биринчи кун 2 очко билан 56-поғонага жойлашганди. Кеча 3 ғалаба ва 1 дуранг қайд этган гроссмейстеримиз 5,5 очко билан 18-ўринга кўтарилиб олди. 

Ўзбекистон шахматчиларининг Рапид бўйича иккинчи кун натижалари:

Эркаклар:

1. Нодирбек Абдусатторов – 7 очко, 6-ўрин

2. Жавоҳир Синдаров – 6,5 очко, 12-ўрин

3. Муҳиддин Мадаминов – 5,5 очко, 45-ўрин

4. Нодирбек Якуббоев – 5,5 очко, 73-ўрин

5. Ҳумоюн Бегмуратов – 4,5 очко, 130-ўрин

6. Шамсиддин Воҳидов – 4,5 очко, 137-ўрин

7. Жаҳонгир Воҳидов – 4 очко, 152-ўрин

8. Муҳаммадзоҳид Суяров – 4 очко, 180-ўрин

Аёллар:

1. Афруза Ҳамдамова – 6 очко, 12-ўрин

2. Гулруҳбегим Тохиржонова – 5,5 очко, 18-ўрин

3. Умида Омонова – 4,5 очко, 61-ўрин

4. Гулдона Каримова – 3,5 очко, 85-ўрин

5. Мадинабону Халилова – 3,5 очко, 98-ўрин

6. Нилуфар Якуббаева – 3 очко, 111-ўрин

Сўнгги кун беллашувлари олдидан FIDE байроғи остида ўйнаётган ва Магнус Карлсенга ҳозирча ягона мағлубиятни тақдим этган россиялик Владислав Артамьев 7,5 очко билан турнир жадвалида пешқадамлик қиляпти. АҚШ вакили Ханс Ниеманн ҳисобида ҳам 7,5 очко бор. Карлсен 7 очко билан кучли учликка якун ясаган. Тўртичи ва бешинчи ўриндаги Алексей Сарана ҳамда туркиялик Ягиз Эрдогмус ҳисобида ҳам 7 очкодан бор. 

Бугун 10-турда Нодирбек Абдусатторов оқ доналарда 14 ёшли туркиялик гроссмейстер Ягиз Эрдогмусга қарши баҳс олиб боради. Жавоҳир Синдаров қора доналарда россиялик Александр Шиманов билан ҳисоб-китоб қилади. Икки пешқадам эса ўзаро дона суришади. 

Аёллар ўртасидаги 9-турда Афруза Ҳамдамова иккинчи доскада оқ доналарда ўзи сингари 6 очкога эга бўлиб турган россиялик Александра Горячкина билан тўқнаш келади. Гулруҳегим Тоҳиржонова қора доналарда украиналик Анна Музичукка қарши ўйнайди.