ФОТО. Усэйт Болт, Нико Росберг, “Лестер”да Спорт “Оскари”!

Саккиз карра Олимпиада чемпиони ямайкалик спринтер Усэйн Болт Laureus академияси томонидан йилнинг энг яхши эркак спортчиси деб топилди. Болт ушбу мукофотни тўртинчи бор қўлга киритди.

Ўттиз ёшли Болт “Йил спортчиси” номинацияси сўровида америкалик баскетболчи Стефен Карри ва Леброн Жеймс, британиялик атлет Мо Фара, португалиялик футболчи Криштиану Роналду ҳамда британиялик теннисчи Энди Маррейни ортда қолдирди.

“Йилнинг энг яхши аёл спортчиси” номинациясида гимнастикачи Симона Байлз ғолиб бўлди. Рио Олимпиадасида 4та олтин ва битта бронза медалини қўлга киритган 19 ёшли Байлз ҳақли равишда ушбу мукофотга эга чиқди.

Ушбу номинацияда ғолибликка германиялик теннисчи, дунёнинг иккинчи ракеткаси Анжелик Кербер, Рио Олимпиадаси чемпионлари - британиялик велоспортчи Лора Тротт, америкалик атлет Эллисон Феликс, ямайкалик енгил атлетикачи Элейн Томпсон, сузиш баҳсларида Олимпиаданинг 4 карра ғолибаси америкалик Кэти Ледеки ҳам даъвогарлик қилишди.

“Йил қайтиши” номинациясида дунёдаги ягона 23 карра Олимпиада чемпиони, америкалик сузувчи Майкл Фелпс Laureus мукофотига эга бўлди.

Шунингдек, турли номинацияларда “Формула-1” пойгачиси, жаҳон чемпиони Нико Росберг, Англия чемпиони “Лестер”, “Чикаго Кабс” бейсбол клуби ҳам ғолиблар қаторида эътироф этилди.