ФОТО. Хайр Рио, салом Токио! Олимпиаданинг ёпилиши маросими

Сайёрамизнинг 207та мамлакати спортчилари ана шу кунлар мобайнида медаллар жамланмаси учун баҳсларда иштирок этишди. Қувонарлиси, тўрт йилликнинг энг нуфузли мусобақаси Ўзбекистон спорти тарихи зарварақларига олтин ҳарфлар ила битиладиган бўлди.

Терма жамоамиз спортчилари якунда 4та олтин, 2та кумуш, 7та бронза, жами 13та медал билан умумжамоа ҳисобида 207 давлат орасида 21-ўринни эгаллади. Ҳали тарихда бунақаси бўлмаганди. Бу натижа билан Мустақил Давлатлар Ҳамдўстлиги ҳамда Болтиқбўйи мамлакатлари орасида Россиядан сўнг иккинчи ўринни эгалладик. Қозоғистон терма жамоаси 3та олтин, 5та кумуш, 9та бронза медали билан 22-поғонадан жой олди.

Мусобақа якунлангач, Рио-де-Жанейро шаҳридаги муҳташам “Маракана” стадионида 31-Ёзги олимпия ўйинларининг тантанали ёпилиш маросими бўлиб ўтди. Маросимнинг кульминацион нуқтасида Рио-де-Жанейро мэри Эдуардо Паэс Олимпиада байроғини Токио губернатори Юрико Коикэга топширди.