Freestyle Chess Grand Slam. Нодирбек 1-турдаёқ амалдаги жаҳон чемпиони билан ўйнайди

Дунёнинг кўзга кўринган гроссмейстерлари қатнашадиган мусобақада икки шахматчимиз - Нодирбек Абдусатторов ва Жавоҳир Синдаров ҳам ўз маҳоратини намойиш қилади. 17 февралга қадар давом этадиган турнир айлана тизимда ўтказилади ва унда бир шахматчи қолган ҳамма иштирокчилар билан рапид форматида ўзаро баҳс олиб боради. 

Қуръа натижасига кўра, Нодирбек Абдусатторов 1-турдаёқ амалдаги жаҳон чемпиони ҳиндистонлик Гукеш Доммараджуга қарши оқ доналарда ўйнайди. Бу икки шахматчи 24 январь куни Вейк-ан-Зее шаҳри мезбонлик қилган Tata Steel Chess турнири доирасида ўзаро тўқнаш келишган ва ўшанда дуранг натижа қайд этилганди. Жавоҳир Синдаров эса 1-турда мезбонлар вакили Винсент Кеймерга қарши қора доналарда ҳаракат қилади. 

Синдаровнинг Гукешга қарши учрашуви 4-турга тўғри келмоқда. Еттинчи турда ўзига хос ўзбек дербисига гувоҳ бўламиз. Нодирбек оқ доналарда Жавоҳир билан ҳисоб-китоб қилади. Бешинчи турда Синдаров, олтинчи турда эса Абдусатторов норвегиялик Магнус Карлсенга қарши баҳс олиб боради.    

Бугун 5, эртага эса қолган 4 тур учрашувлари ўтказилади. Кучли саккизликдан жой олган шахматчилар плей-офф босқичига йўл олади. Бу босқичда ҳар бир матч икки классик партиядан иборат бўлади. Агар икки учрашув натижасига кўра ҳисоб тенг бўлиб қолса, ғолиб тай-брекда аниқланади. Вақт назорати 90 дақиқа бўлиб, кейин ҳар бир юришга 30 сониядан қўшиб борилади.