“Fujairah Open” турнирининг сўнгги куни биттадан кумуш ва бронза

Мазкур мусобақада ўсмир ва кадетлардан иборат 547 нафар таэквондо устаси баҳс олиб борди. Турнирда Ўзбекистон терма жамоаси ҳам катта таркиб билан иштирок этди.

Бош мураббий Акмал Эргашев ва мураббий Жасур Бойқўзиев қўли остида катталар терма жамоаси таркибида Валентин Хегай (-54 кг), Темур Ўролов (-58 кг), Никита Рафалович (-74 кг), Максим Рафалович (-80 кг) каби етакчи даян усталаримиз медаллар учун даянга чиқишди.

Ўзбекистон таэквондо WTF ассоциацияси раҳбарияти Абдувоҳид Раҳимов бошчилигидаги ўсмирлар ҳамда Собир Назаралиевнинг кадетлар жамоасига ҳам халқаро мусобақада катта ишонч билдирди.

Мусобақанинг биринчи куни кадетлар таркибида Даниил Ким, Амирбек Тўраев, Азизбек Раҳмонбердиев олтин, Жавоҳир Холмуродов кумуш медални қўлга киритган бўлса, катталар жамоаси шарафини ҳимоя қилган Темурбек Ўролов делегациямизга бронза медалини келтирди.

Иккинчи куни ўсмирлар ҳисобига Ислом Йўлдошев, Динора Мухторова, Феруза Содиқова бронза медалини ёзиб қўйган бўлса, катталар таркибида ҳаракат қилган Никита Рафалович кумуш, Мафтуна Эргашева, Светлана Осипова, Валентин Хегай бронза медали билан кифояланишди.

Кеча халқаро турнирнинг сўнгги куни спортчиларимиз яна иккита медалга сазовор бўлишди. Шуҳрат Салаев кумуш, -80 кг вазнда даянга чиққан Максим Рафалович эса бронза медалини қўлга киритди.