Футзал. Бугун 1-босқичнинг 3-тур ўйинлари старт олади

16-22 январь кунлар ўтказилиши белгиланган тур ўйинларига пойтахтимиздаги “Ўзбекистон”спорт мажмуаси мезбонлик қилади. Бугун амалдаги мамлакат чемпиони Тошкент вилоятининг “Олмалиқ” жамоаси пойтахтнинг “Локомотив” клубига қарши майдонга тушади.

“Ардус” эса Андижоннинг “Турон-Солиқчи” жамоаси билан учрашади. Куннинг иккинчи ярмида “Металлург”–“Максам-Чирчиқ”, “Когон”–“Нафис”, “Дўстлик-AIN”–“Бунёдкор” жуфтликлари ўзаро ўйинда муносабатларига ойдинлик киритиб олишади.

Бугун “Пахтакор”жамоаси учун дам олиш куни сифатида эълон қилинган. Биринчи босқичнинг дастлабки икки тури якунларига кўра Қаршининг “Дўстлик-АИН” клуби 28 очко билан турнир жадвалида пешқадамлик қиляпти.

Айнан қаршилик футзалчилар олий лигада мағлубиятга учрамаган ягона жамоа бўлиб туришибди. Иккинчи ўриндан жой олган “Олмалиқ” жамоаси ҳисобида 25 очко бор. “Когон” ва “Ардус” клублари 22тадан очко жамғариб, кейинги ўринларни банд этишган.

Тўпурарлар рўйхатида 12тадан голга эга “Когон” футзалчиси Улуғбек Рамазонов ва “Ардус” етакчиси Даврон Чориев карвонбошилик қилишяпти.