Фьюри Усик-Жошуа жанги ҳақида: "Уларнинг қўйган талаблари кулгили"

"Лўлилар қироли"нинг фикрича, Жошуа Усикка мағлуб бўлганидан кейин фаолиятини якунлайди.

"Бу сўзларни илк бор айтяпман. Усик реванш жангида Жошуани мағлуб этади. Энтони буни қабул қилишга журъати етмаса, демак унинг фаолияти тугаш арафасида. Учта мағлубият ва алвидо... Уни биринчи оғир вазн тоифасидаги боксчи мағлуб этди.

Жошуа Усикка қарши жангда шармандаликнинг олдини олиши, ёки унинг ўрнига ҳамма муаммоларни ҳал қилишимга рози бўлиши мумкин эди. Шу билан бирга пул ҳам ишлаб оларди. Аммо, Жошуа очкўзлик қилди.

Улар мени мутлақ жаҳон чемпиони унвони учун курашда ҳамма нарсага тайёрлигимни билишади. Лекин, уларнинг қўйган талаблари кулгили эди", — дея Фьюрининг сўзларидан иқтибос келтирган Dazn.

Эслатиб ўтамиз, Жошуа ва Усик ўртасидаги реванш жанги 23 июль куни бўлиб ўтиши кутилмоқда.