Фьюрининг промоутери Жошуага қарши жанг ҳақидаги гап-сўзларга ойдинлик киритди

Аввалроқ Тайсон Фьюри ва Энтони Жошуа ўртасидаги жанг 2026 йилнинг баҳор фаслида Лондон шаҳридаги муҳташам "Уэмбли" стадионида ўтказилиши айтилган эди. 

"Баъзида улар жуда яхши маълумотга эга бўлади, - деди Уоррен The Ring журнали хабари ҳақида talkSPORT`га берган интервьюсида. - Мен бу ҳақда изоҳ бермайман, лекин улар жуда яхши хабардор. Шу боис умид қиламизки, шундай бўлади ва томошабинлар келаси йили ўзлари хоҳлаган нарсани олишади, яъни бу икки собиқ чемпион бир-бирига қарши ўз ҳамюртлари кўз ўнгида рингда тўқнаш келади". 

Уорреннинг сўзларига кўра, Фьюрини кўпроқ Жошуа ёки Александр Усикка қарши жанглар қизиқтирмоқда. Лекин ҳозирда собиқ чемпион бошқа лойиҳалар билан жуда банд, гарчи у яқинларининг хоҳишига қарши рингга қайтишга тайёрланаётган бўлса ҳам.

"Мен Фьюри билан бир неча ҳафтадан бери гаплашмадим, чунки у жуда банд, - деди промоутер. - У Netflix учун At Home With The Fury’s (Фьюрининг уйида) ҳужжатли фильмини суратга олишда иштирок этяпти. Ва яна бошқа кўплаб нарсалар билан шуғулланади, шунинг учун у жуда банд. Аммо шунга қарамай, Тайсон машғулотларни ташлаб қўймайди. У билан гаплашсам, ҳар доим рингга қайтишни хоҳлаётганини таъкидлайди. Унинг оиласи буни хоҳламайди, лекин ўзи қайтишни истайди".

Эслатиб ўтамиз, Тайсон Фьюри 2024 йил декабрь ойида Александр Усикдан кетма-кет иккинчи мағлубиятини қабукл қилиб олганидан сўнг, шу йилнинг январь ойида фаолиятини якунлаган эди. Уоррен мижозининг бундай қисқа танаффусдан кейин боксдаги фаолиятини давом эттиришда муаммо кўрмаяпти.

"Кўплаб боксчилар узоқ танаффусдан кейин рингга қайтишади ва фикримча, бу энг яхши қарор эмас. Агар Тайсон қайтса, кейинроқ эмас, эртароқ бу ишни амалга оширгани маъқул. Бир йил ичида рингга қайтиш катта муаммо эмас, менимча", - дея сўзларига якун ясади Уоррен.