Гандболнинг ривожланиши йўлидаги устувор вазифалар белгилаб олинди

Шу сабабдан, кеча Республикамизда гандбол спорт турини ривожлантириш ва аҳоли ўртасида кенг оммалаштириш юзасидан мутасаддилар иштирокида йиғилиш ўтказилди.

Видеоконференция шаклида ўтказилган йиғилишда Жисмоний тарбия ва спорт вазирининг биринчи ўринбосари Равшан Эрматов ва Миллий Олимпия қўмитаси президенти Рустам Шоабдураҳмонов иштирок этди. Йиғилишда гандболнинг ривожи йўлида олиб борилаётган ишлар муҳокама этилди.

Масъуллар Республикамиз бўйлаб ҳар бир ўқув муассасаларида спорт заллари, маҳаллаларда, чекка қишлоқларда ўйин майдончалари мавжуд бўлсада, лекин жойларда гандбол бўйича спорт инвентарларига эҳтиёж катта эканлигини қайд этишди.

Ҳозирги кунда ушбу спорт тури билан 721 нафар мураббий ва 100 мингдан ортиқ спортчилар шуғулланади. Аммо уларнинг бор йўғи 300 нафаригина профессионал тарзда машғулотлар олиб бормоқда. Шу туфайли турли ёшдаги терма жамоаларда рақобат кескин паст эканлиги ва шунга монанд равишда уларнинг халқаро майдонлардаги натижалари ҳам мақтанишга арзигулик эмас.

Йиғилиш давомида терма жамоаларнинг яхши натижаларга эришишида спортчиларга етарли шароит яратиб бериш бўйича таклифлар кўриб чиқилди. Шунингдек, мутасаддилар томонидан гандбол спорт тури бўйича жаҳон стандартлари талабига жавоб бера оладиган база ташкил этиш масаласи ҳам ўртага ташланди.

Йиғилишда гандболнинг оммавийлигини янада ривожлантириш, унинг томошабоплиги ва ҳомийларини шакллантириш зарурияти, эркаклар, аёллар, талабалар ва болалар лигаларини ҳар томонлама қўллаб-қувватлаш, барча ёшдаги терма жамоаларнинг мураббийлар штабига селекция ишларига эътибор қаратиш, йил якуни бўйича Бош мураббийлар фаолиятига алоҳида баҳо берилиши каби вазифалар белгилаб олинди.

Гандболчиларнинг ўйин амалаиётини ошириш борасида умумтаълим ва олий ўқув юртлари ўртасида турли даражадаги мусобақалар сонини кўпайтириш лозимлиги қайд этилди.