Grand Swiss 2025. Бир кунлик дам олишдан сўнг бугун 7-тур баҳслари ўтказилади. Нодирбекларни жиддий синов кутмоқда

Бугун бир кунлик танаффусдан сўнг 7-тур учрашувлари ўтказилади. Нодирбек Абдусатторов (2748) оқ доналарда ўзи сингари 4 очкога эга бўлиб турган эронлик Амин Табатабайи (2673)га қарши баҳс олиб боради. Нодирбек Якуббоев (2681) эса қора доналарда франциялик номдор шахматчи Алиреза Фирузжа (2754) синовидан ўтади. Ҳар икки гроссмейстер 4 очкодан жамғаришган. 

Мусобақани бироз омадсиз ўтказаётган Жавоҳир Синдаров (2722) оқ доналарда арманистонлик Роберт Ҳованисян (2629) билан ҳисоб-китоб қилади. Шахматчилар ҳисобида 3 очкодан бор. Турнир жадвалида 5 очко билан якка пешқадамлик қилаётган эронлик Парҳам Мақсудлу (2692) бугун қора доналарда ҳиндистонлик Ниҳал Сарин (2693) билан ўйнайди. 

WOMENS, яъни аёллар гуруҳида ҳамюртларимиз орасида энг яхши натижага эришиб турган биринчи рақамли шахматчи-қизимиз Афруза Ҳамдамова (2409) бугун 7-турда қора доналарда 15-Жаҳон чемпиони, украиналик гроссмейстер Мария Музичук (2484)ка қарши баҳс олиб боради. Ҳар икки шахматчи ҳисобида 4 очкодан бор. Гулруҳбегим Тоҳиржонова (2372) ўзи сингари 2,5 очкога эга польшалик Оливия Киолбаса (2405) билан тўқнаш келади.