"Ҳар кеча ўлиб қолишдан қўрқардим". У кунига икки қути сигарет чекарди, аммо орзуси йўлида 60 кг вазн йўқотди ва UFC жангчисига айланди

Халил Раунтри ҳикояси

UFC Fight Night кечасида Халил Раунтри Энтони Смит билан жанг қилди ва рақибини учинчи раундда нокаут қилишга эришди. Ушбу ғалаба орқали Халил ўрта вазн рейтингининг ТОП-10 талигига кириши мумкин. 

Раунтри катта номга эга жангчи эмас, бироқ унинг ҳикояси ҳаётда ҳамма нарса бўлиши мумкинлигини исботлайди.

Раунтри ўғирлик туфайли отасини йўқотди ва бу воқеадан сўнг тушкунликка тушди. Мактабда ҳеч ким билан гаплашмайдиган, доим фаст-фуд тановул қилиб, 140 кг вазнга эга бўлди.

Раунтри отасидан жуда эрта айрилган. У 2 ёшлигида отасини ўлдириб кетишган. Она болаларни ёлғиз ўзи тарбиялаган ва Халил 13 ёшга тўлганида онаси унга отаси зўравонлик қурбони бўлгани ҳақида гапириб берган. Ёш болакай буни аввал хотиржам қабул қилган, лекин йиллар давомида оғриқ кучайиб борган.

Раунтри якка юрадиган бўлиб қолди, вазни ҳам тинимсиз ортиб борарди. Бунинг натижасида мактабда уни ҳақорат ва мазаҳ қила бошлашди. Бу тушкунлик ва ўзини ўзи йўқ қилиш даражасига етди: 19 ёшида Раунтри кунига икки қути сигарет чекди, тинимсиз овқат истеъмол қилди ва вазни 140 кгдан ошди.

У кунига 2 литр спиртли ичимлик ичарди ва ҳар тун ўлиб қолишдан қўрқиб яшарди. Энг ачинарлиси эса унинг ҳаётдан мақсади йўқ эди. 

Халил бу воқеаларни шундай эслайди: "19 ёшимда вазним 140 кг бўлган. Кунига 2 қути тамаки чекиб, тўхтовсиз спиртли ичимликлар ичардим. Ҳаётдан мақсадим, эртам нима бўлиши ҳақида ўй ҳам йўқ эди. Ҳар куни уйғонганимда маст ҳолда бўлардим".

Раунтри ММА ҳақида билганидан сўнг барчаси ўзгарди. У мактаб вақтида спорт билан шуғулланмаганди. Акалари унга UFC'ни кўрсатишди ва Халилда бирдан бу спорт турига муҳаббат қўйди. Унга спортчилардаги характер ёқди. Ўшанда барчаси ўзининг қўлида эканлигини тушуниб етди. Шундан сўнг бўлажак жангчи ММА билан шуғулланишга қарор қилди.

Раунтри ММА афсонаси Вандерлей Силва залида машғулот олиб борди. Бир йил ичида 45 кг вазн ташлади ва TUF орқали UFC жангчисига айланди.

Халилнинг акалари уни Wanda Fight Team залига олиб боришди. Раунтри Вандерлей Силва сингари жанг қилишни истади. У биринчи машғулотнинг ўзида якка курашларга меҳр қўйди. Мураббийлар ҳам унинг ортиқча вазни борлигига қарамасдан, келажакда кучли жангчи бўлиши мумкинлигини айтишди. 

Бироқ Халилга бошида жуда оғир бўлди, чунки у ҳеч қачон спорт билан шуғулланмаганди. Унинг ортиқча вазни ҳаракатланиш учун халақит берарди. Бироқ акалари ёш жангчини қўллаб туришди, кўп ўтмай машғулотлар натижа бера бошлади.

Халил 11 ой ичида 45 кг вазн ташлашга эришди ва яна вазн ташлашда давом этди. У ҳар куни ўсиб борди – сигаретни, газланган сувни ташлаб, югуришни бошлади. У ҳатто уни "судраб юрган" дўстларидан воз кечди:

"Мен ҳаёт тарзимни бутунлай ўзгартирдим. Қисқа вақт ичида озиш учун дўстларим билан хайрлашдим, телефон рақамимни алмаштирдим. ММА менинг ҳаётимга айланди. Вазн ташлаш мен учун оддий машғулот эмасди. Бу мутлақо янги ҳаёт тарзи, янги тана ва ҳамма нарса эканлигини англадим. Агар сиз ҳаётингизни ўзгартирмоқчи бўлсангиз, ММА яхши танлов бўлиши мумкин.

Менинг мойиллигим тасалли, озиқ-овқат ва кўп миқдордаги спиртли ичимликлар эди. ММАга боришни бошлаганимдан сўнг бутунлай бошқача ҳаёт тарзи бошланди. Мен аввалги дўстларимдан воз кечдим, чунки уларнинг ҳаёт тарзи бошқача эди. Мен буни ҳамма қилиши керак, деб айтмайман. Аммо мен ҳаётимни ўзгартириш учун ўзимни яккалашим янги инсон бўлишим кераклигини англадим".

Раунтри TUF'нинг 23-турниридан сўнг UFC билан шартнома имзолади. У финалда ютказди, бироқ барибир UFC билан шартнома имзолади. Қизиғи, Халил TUF'нинг саралашида ҳам мағлуб бўлганди, бироқ рақибнинг жароҳати сабабли кейинги босқичга ўтган эди.

Халилнинг UFC'даги юриши ҳам омадли бошланмаган. У 2017 йилда Тайсон Педрога қарши дебют жангида мағлуб бўлган. Шундан сўнг у Ион Куцелаба, Жонни Уокер ва бошқа жангчиларга ҳам ютқазиб қўйди. Ҳозирда Раунтри UFC'да бешта ғалабадан иборат ғалабали серияга эга. Бу унинг рекорди ҳисобланади. У Смит устидан ғалаба қозонса, UFC ТОП-10 рейтингига кириши мумкин. 

"Ҳали ҳам курашяпман. Онам ва коллежда ўқийдиган синглимни таъминлашим керак. Оилам билан бошдан кечираётган жараёнимиз давом этмоқда, мен ҳаётимда содир бўлган барча нарса учун Яратгандан миннатдорман. Энг асосийси, сиз кўп нарсага қодир эканлигингизга ишонинг".