Ҳасанбой Дўсматовнинг танзанияликка қарши жанги бекор бўлди, қолган боксчиларимизнинг рақиблари маълум

Дўсматов 28 август куни Россия Федерацияси пойтахти Москва шаҳрида ташкил этиладиган профессионал бокс кечасида рингга кўтарилиши ва у шу куни танзаниялик 23 ёшли боксчи Йохана Мчанжага қарши жанг ўтказиши лозим эди. Аммо, кутилмаганда ушбу жанг бекор қилинди. 

Маълумот учун, африкалик чарм қўлқоп устаси фаолияти давомида 15 та жанг ўтказган. Ҳисобида 12 ғалаба ва 3 мағлубият бор. Рақибларини 10 та жангда муддатидан аввал мағлубиятга учратган. Ҳозирча Дўсматов - Мчанжа жангининг нима сабабдан бекор бўлгани маълум эмас. 

Бу Ҳасанбой учун проф фаолиятидаги тўртинчи жанг бўлар эди. У охирги жангини 3 апрель куни "Ҳумо Арена"да Мухсин Кизотага қарши ўтказиб, ғалабага эришганди. Ўшанда 10 раундга мўлжалланган жанг вакант бўлиб турган WBA International камари учун кечган ва унда чарм қўлқоп устамиз рақибини учинчи раундда нокаутга учратган эди.   

Шунингдек, 28 август кунги бокс кечасида ўзбекистонлик боксчилардан Баҳромжон Фозилов, Мирзакамол Неъматов, Элдор Абдуқодиров ва Ҳусан Йўлдошев ҳам ўз жангларини ўтказишади. Йўлдошев россиялик Мурад Далхаевга, Неъматов арманистонлик Манук Диланянга, Фозилов украиналик Дмитро Богдановга қарши ригга чиқади. Биргина Абдуқодировнинг ҳозирча рақиби маълум эмас.