"Ҳеч кимга зерикарли чемпион керак эмас". Уокер Блахович - Анкалаев жанги натижасини тўғри деб ҳисоблашини айтди

Ярим оғир вазн тоифасида бразилиялик UFC жангчиси Жонни Уокер (18-7) польшалик Ян Блахович (29-9-1) ва россиялик Магомед Анкалаев (17-1-1) ўртасидаги дуранг билан якунланган чемпионлик жанги ҳақида гапирди.

"Ҳаммаси тўғри якунланди. Бу жанг жуда суст кечди. Натижадан нафақат UFC, балки мухлисларнинг ўзи ҳам қониқиш ҳосил қилгандек туюлади. Очколар ҳисобига ғалаба қозонадиган зерикарли чемпионни ҳеч ким хоҳламайди. Одамлар нокаутлар ва сабмишенларни ёқтиришади. Менга йигитларнинг рақибини нокаут қилиш учун бор кучларини сарфлаши ёқади.

Бу UFC ва мухлислар учун яхши бўлди: энди Гловер ва Жамал чемпионлик учун курашади, улар нокаут билан ғалаба қозониш учун қўлидан келган барча ишни қиладиган жангчилар ва уларнинг жангларини ҳамма кўришни истайди.

Менимча, бу тоза дуранг бўлди. Жанг бошида Блахович Анкалаевнинг оёғини "зўриқтирган"  бўлса, охирига келиб Анкалаев устунликка эга бўлди. У охирги раундни рақибининг устига ўтириб тугатди, аммо қолганларида унчалик устунлик қилмади, шунинг учун ҳакамлар дуранг натижани эълон қилиб, тўғри қарор қилишди, деб ўйлайман.

Агар Анкалаев жангни якунламоқчи бўлганида, охирида бироз "темп"ни кўтарган бўларди. Масала ҳакамларга етиб борди, шунинг учун шикоят қиладиган ҳеч нарса йўқ, фақат уларнинг қарорини қабул қилиш қолади", - дея Уокернинг сўзларини келтиради Ag. Fight нашри.

Магомед Анкалаев (17-1-1) ва Ян Блахович (29-9-1) иштирокида 11 декабрь куни Лас-Вегас (АҚШ)да ташкиллаштирилган UFC 282 мусобақасининг марказий, чемпионлик жанги ҳакамларнинг қароридан сўнг дуранг билан якунланган эди. Эндиликда яримоғир вазн тоифасида вакант қолаётган чемпионлик камари учун мазкур камарнинг собиқ "эгаси", бразилиялик 43 ёшли Гловер Тейшейра (33-8) ҳамда америкалик Жамал Хилл (11-1-1) жанг қилади. Мазкур жанг 2023 йилнинг 21 январь куни Бразилиянинг Рио де Жанейро шаҳрида ташкиллаштиралаётган UFC 283 мусобақаси доирасида марказий қарама-қаршилик сифатида ўтказилади.