"Ҳумо арена" мезбонлик қиладиган илк йирик турнирга тайёргарлик авжида

Нуфузли мусобақага муносиб мезбонлик қилиш эса катта меҳнат ва масъулият талаб этади. Мусобақа бўлиб ўтадиган “Ҳумо арена” кўп тармоқли муз саройида Гран-при ишчи гуруҳининг энг сўнгги ва энг катта йиғилиши бўлиб ўтди. 

Унда МОҚ вице-президентлари Азизжон Камилов ва Сакен Полатов, Жисмоний тарбия ва спорт вазирининг биринчи ўринбосари Ойбек Касимов, Паралимпия ассоциацияси раиси Мухторхон Ташходжаев, шунингдек, Ўзбекистон дзюдо федерацияси раҳбарияти, Тошкент Гран-присига тайёргарлик кўриш бўйича Вазирлар Маҳкамасининг йиғилиш баёнига биноан бириктирилган барча вазирлик ва идораларнинг мутасаддилари иштирок этди.

Йиғилишда “Ҳумо арена”нинг 20-22 сентябрь кунлари Гран-при ва 23-24 сентябрда парадзюдо Гран-присини қабул қилишга қанчалик шайлиги, халқаро ташкилот ва делегация вакиллари учун яратиб берилган шароитлар, мусобақанинг тантанали очилиш маросимига кўриладиган тайёргарлик, беллашувларнинг маҳаллий ва хорижий телеканалларга трансляция қилинишида, баҳслар давомида техника ва интернет тармоғининг узлуксиз етказиб берилишида юзага келиши мумкин бўлган камчиликларнинг олдини олиш бўйича чора-тадбирлар муҳокама қилинди.