Ҳумоюн Султонов дунёнинг собиқ 18-ракеткасини мағлуб этди

Ҳиндистоннинг Пуна шаҳрида ўтказилаётган ушбу "Челленжер" туркумига кирувчи мусобақанинг мукофот жамғармаси 160 000 АҚШ долларини ташкил қилади. Ҳамюртимиз ҳозиргина якунига етган 1/8 финал учрашувида австралиялик тажрибали Бернард Томични уч сет натижасига кўра мағлубиятга учратди. 

Ҳумоюн 104 дақиқа давом этган баҳсда Яшит қитъа вакили устидан иродали ғалабага эришди. Биринчи сетни 4/6 ҳисобида бой берган Султонов якунда ғалабани ўз томонига оғдириб олди - 6/3, 6/3. Бу теннисчиларнинг ўзаро ўтказган илк учрашуви бўлди. Бернард 11, Ҳумоюн 6 та эйс зарбасини амалга оширган.  

Таққослаш учун, теннисчимиз айни пайтда ATP рейтингининг 229-поғонасидан жой олган. Ҳозир дунёнинг 227-ракеткаси бўлиб турган австралиялик теннисчи эса ўз вақтида дунёнинг 18-ракеткаси бўлган эди. Дарвоқе, Ҳумоюн 1/6 финалда бошқа бир австралиялик теннисчи, турнирнинг учинчи ракеткаси, жаҳон рейтингида 134-ўринни эгаллаб турган Тристан Скулкейтни уч сет натижасига кўра мағлубиятга учратди - 6/3, 4/6, 6/3.