Икки медаль эвазига умумжамоа ҳисобида 80 давлат орасида иккинчи ўриндамиз + ЖАДВАЛ

Бугун эркаклар -60, -66, аёллар эса -48, -52 ҳамда -57 кг вазн тоифаларида мусобақа медаллари учун татамига чиқишди. Бугунги беллашувлардан сўнг умумий 80 давлатдан 14 таси камида битта бронза медалини қўлга киритди. Олти мамлакат ҳисобида камида биттадан кумуш, беш давлатда эса олтин медаль бор. Яъни, бугунги 5 та вазнда турли мамлакат вакиллари чемпионлик шоҳсупасига кўтарилишди. 

Қувонарлиси, Тбилисида мадҳияси баралла янграган давлатлар орасида Ўзбекистон ҳам бор. -66 кг вазн тоифасида юртимиз шарафини ҳимоя қилган Сардор Нуриллаев олтин медаль соҳибига айланди. Унинг укаси Кемран эса кумуш медаль билан тақдирланди. Айнан шу икки медаль ҳисобига Ўзбекистон умумжамоа ҳисобида 2-ўринни эгаллаб турибди. Биринчи ўриндаги Грузия терма жамоаси бизга қараганда битта кўп кумуш медаль жамғарган. Бугун Италия, Мўғулистон ва Косово делегациялари ҳам бир нафардан чемпионга эга бўлишди.