Икки мутлақ жаҳон чемпионлари тарозидан муваффақиятли ўтиб олди

Турнирнинг қизиқарли жанги аёллар ўртасида икки мутлақ жаҳон чемпионлари ўртасида ўтказилади. Унда биринчи яримўрта вазнда барча камарлар соҳибаси, британиялик Шантель Кэмерон енгил вазнда мутлақ жаҳон чемпиони, ирландиялик Кэти Тейлорга қарши рингга кўтарилади. 

Бу Тейлор учун реванш мақомидаги жанг бўлади. Шу йилнинг май ойида ўтган илк жангда  Шантель Кэтига фаолиятидаги илк мағлубиятни тақдим этганди. Кеча тунда бокс маликалари тарози маросимидан муваффақиятли ўтиб олишди. Кэмерон 63,27 кг, Тейлор эса 63,32 кг вазн қайд этди.

Худди биринчи жангда бўлгани каби бугунги тўқнашув Кэмероннинг биринчи яримўрта вазндаги барча чемпионлик камарлари учун кечади. Шантель проф боксда 18 та жанг ўтказган бўлиб, барчасида ғалаба қозонган. Нокаутлари сони 8 тани ташкил этмоқда. Тейлор эса 22 ғалаба ва 1 мағлубият қайд этган.