Испания триатлон федерацияси билан ҳамкорлик меморандуми имзоланди

"Ўзбекистон Триатлон Федерацияси Испания Триатлон Федерацияси билан ҳамкорлик меморандуми имзолади! 

Бу биз учун муҳим халқаро қадам: мазкур ҳамкорлик спортчиларни тайёрлаш ва мусобақаларни ташкил этишда амалий ҳамкорликни йўлга қўйиш имконини беради. Ушбу шериклик орқали тажриба алмашиш, натижаларни яхшилаш ва ўзаро ҳамкорликни мустаҳкамлашга эришамиз.

Меморандум асосида қуйидаги амалий қадамлар кўзда тутилган:

Ўзбекистон ўсмирлар терма жамоаси учун Испанияда ўқув-машғулот йиғинлари.

Испания миллий жамоалари билан бир муҳитда, испан мураббийлари раҳбарлигида ва мутахассислар иштирокида тайёргарлик олиб бориш.

Самарқандда қўшма ишлар.

World Triathlon Championship Series Samarkand мусобақасини тайёрлаш ва ўтказиш жараёнида испан ташкилий жамоаси вакилларини қабул қилиш.

Йирик мусобақаларда жамоамиз учун амалий тажриба.

Испанияда European Triathlon Championship (Таррагона) ҳамда World Triathlon Grand Final (Понтеведра) мусобақаларида Ўзбекистон Триатлон Федерацияси вакилларини ташкилий жараёнларда иштирок этиш учун қабул қилиш.

Бу ҳали бошланиши холос — меморандум икки федерация фаолиятини янада кучайтириш, спортчиларни ривожлантириш ва мусобақаларимизни янада профессионал даражага олиб чиқиш учун янги қўшма ташаббуслар асосини яратади", дейилади ташкилот хабарида.