Дональд Трамп UFC жангчисига ёрдам беради

Гап шундаки, Медич Хьюстондаги UFC Fight Night 267 турнирида қўлга киритган ғалабасидан сўнг АҚШ президенти унинг иммиграция муаммоларини ҳал қилишга ваъда берди.

Биринчи раундда Жефф Нилни нокаутга учратган Медич жангдан кейинги интервьюсида собиқ чемпион Леон Эдвардсни жангга чақирди ва улар шу ёзда Белградда бўлиб ўтадиган турнирда жанг қилишлари бўйича таклиф берди. 

"Аммо битта кичик муаммо бор. Иммигрантлар менинг ҳужжатларимни ушлаб туришади ва бу туфайли мен саёҳат қила олмайман. Шунинг учун мен сиздан ёрдам сўрайман: Жаноб Президент, агар буни кўрсангиз, илтимос, биз шу ёзда Сербиянинг Белград шаҳрига UFC турнирига боришимиз керак", дея айтиб ўтган спортчи.

Медич кейинчалик айтиб ўтганидек, Дана Уайт тез орада уни ўз офисига таклиф қилган ва Трамп билан телефон орқали суҳбатлашиш имкониятини берган. Дональд Трамп эса сербиялик жангчини унинг муаммоси ҳал қилинишига ишонтирган.

Медичнинг сўзларига кўра, у иш визасини олганидан бери сўнгги беш йил давомида Қўшма Штатларда яшаб келган ва шу вақт ичида мамлакатни тарк этмаган, чунки унга қайтиб киришга рухсат берилмаслигидан қўрққан.