Икки шахматчимиз Жаҳон кубогининг кейинги босқичида, қолган иккиси бугун тай-брекда ўйнайди

Дунёнинг 206 нафар шахматчиси қатнашаётган нуфузли мусобақанинг 1/64 финал босқичида иккинчи учрашувлар ўтказилди. Тўрт гроссмейстеримиздан икки нафари - Жавоҳир Синдаров ва Нодирбек Якуббоев икки ўйин натижасига кўра ғалаба қозониб, учинчи босқичга йўл олди. Синдаров биринчи учрашувда қора доналарда черногориялик Никита Петровни мағлубиятга учратганди. Жавоб баҳси дуранг натижа билан якунланди. 

Нодирбек Якуббоев германиялик Никлас Хашимбентни таслим этди. Уларнинг илк баҳсида томонлар муросага келишганди. Икки ўйин натижасига кўра 1,5:0.5 ҳисобида зафар қучган Якуббоев ҳам кейинги босқичга чиқди. Қолган икки шахматчимиз - Нодирбек Абдусатторов ва Шамсиддин Воҳидов жавоб учрашувида ҳам рақиблари билан муросага келишди. Бугун улар ҳал қилувчи тай-брекда ўйнашади. 

Гроссмейстерларимизнинг 1/64 финал босқичидаги натижалари: 

Нодирбек Абдусатторов - Денис Махнев (Қозоғистон) - 1:1

Жавоҳир Синдаров - Никита Петров (Черногория) - 1,5:0,5

Нодирбек Якуббоев - Никлас Хашимбент (Германия) - 1,5:0,5

Шамсиддин Воҳидов - Максим Чигаев (Испания) - 1:1

Бугунги тай-брек партиялари бизнинг вақт билан соат 14:30да бошланади. Жавоҳир Синдаровнинг учинчи даврадаги рақиби грециялик Николас Теодору ва сербиялик Александар Инджич ўртасидаги тай-брек учрашувидан сўнг маълум бўлади. Нодирбек Якуббоев учинчи даврада вьетнамлик Ван Нгуенга қарши дона суради. 

Иккинчи босқичда кутилмаган натижалар ҳам кузатилди. Хусусан, таниқли гроссмейстерлардан Уэсли Со, Ян Непомняший, Аравиндҳ Читамбарам, Володар Мурзин, Василий Иванчук, Давид Навара, Мишра Абҳиманю икки ўйин натижасига мағлуб бўлиб, Жаҳон кубогидаги иштирокини якунлади.