Икки теннисчимиз Покистондаги турнирда чорак финалга чиқишди

Соврин жамғармаси 15 000 АҚШ долларини ташкил қилувчи мусобақада уч нафар ҳамюртимиз ҳам иштирок этяпти. Улардан икки нафари саралаш баҳсларида ғолиб чиқиб, асосий тўрга йўл олган бўлса, яна бир тўғридан-тўғри ушбу имкониятга эга чиқди. 

Кеча теннисчиларимиз жуфтлик баҳсларида кортга чиқишди. Сербиялик Дарко Яндрич билан тўртинчи рақамли жуфтлик ҳосил қилган Шониғматжон Шофайзиев илк даврада мезбон теннисчилар - Аҳмад Чоудхари ҳамда Шаҳзод Хонни 6:4, 5:7, тай-брекда 11:9 ҳисобида таслим этиб, чорак финалга йўл олишди. 

Россиялик Дмитрий Мягков билан жуфтлик ҳосил қилган Саидаъло Саидкаримов ҳам чорак финал иштирокчисига айланди. Улар покистонлик теннисчилар - Муса Чоудхари ва Малик Абдул Раҳмонга ҳеч қандай имконият қолдиришмади - 6:0, 6:0.