Икки вазнда UFC рейтинги янгиланди: Эрнандес "плюс"да, Долидзе Топ-10`дан чиқиб кетди

Якшанба тонгида Лас-Вегасда ўтган UFC on ESPN 72 турнирининг асосий жангида Роман Долидзени мағлубиятга учратган Энтони Эрнандес рейтингдаги ҳолатини сезиларли тарзда яхшилаб олди. У 10-поғонадан 7-ўринга кўтарилди ва бу билан UFC камари учун даъвогарлар қаторига қўшилди. 

Аксинча, тўртинчи раундда бўғиш усулига тушиб қолиб ютқазган Роман Долидзе 9-ўриндан 11-поғонага тушиб кетди. Роберт Уиттакер ва Жаред Каннонир ҳам рейтингда бир поғонадан пастлади. Брендан Аллен эса аксинча, бир поғонага юқорилаб, Топ-10`таликни якунлаб берди. Шу ҳафта Хамзат Чимаевдан камарини ҳимоя қиладиган Дрикус Ду Плесси вазн чемпиони бўлиб турибди.  

Аёллар биринчи енгил вазн тоифаси рейтингида ҳам ўзгаришлар кузатилди. Лас-Вегасдаги турнир доирасида ғалабага эришган Ясмин Лусиндо 8-поғонадан 7-ўринга кўтарилди. Бразилиялик аралаш яккакураш устаси ҳакамларнинг якдил қарори билан тажрибали Анжела Хиллни мағлубиятга учратганди. Гарчи ютқазган бўлса-да, Хилл 12-ўринни сақлаб қолди. Ясминнинг ҳамюрти Табата Риччи эса бир поғонага пастлади. Хитойлик Жанг Вей Ли ушбу вазн чемпиони бўлиб турибди.