Инфантино ФИФАга аъзо давлатларга 40 млн. доллардан "пора" таклиф қилди

Жанни Инфантино ФИФАга аъзо давлатларга жаҳон чемпионати ҳуқуқлари улушини сотишдан тушган маблағнинг бир қисмини таклиф қилмоқда. Аввалроқ ФИФА президенти турнир ҳуқуқларининг бир қисмини ташқи инвесторларга сотмоқчи экани маълум бўлган эди. The Times хабарига кўра, Инфантино ташкилотнинг барча 211 та аъзо ассоциациясига агар унинг режасига рози бўлсалар, ҳар бирига 40 миллион доллардан тўлашни ваъда қилган. Шу билан бирга, уларда таклифни қабул қилиш учун бор-йўғи 53 кун вақт бор.

"Бу таклифни қабул қилиш ёки қилмаслик тўғрисидаги қарор тўлиқ ўзингизга боғлиқ. Агар уни қабул қилишни хоҳласангиз, 10 миллиард долларлик пакет 2027 йилнинг 1 январидан бошлаб мавжуд бўлади ва бу бизнинг биргаликдаги саёҳатимизнинг кейинги босқичи бошланишини англатади.

Агар статус-квони сақлаб қолишга ва бу таклифни рад этишга қарор қилсангиз, биз аввал эълон қилинганидек, Forward дастурини [молиялаштиришни кўпайтириш бўйича] 2,7 миллиард долларга кенгайтиришга тайёрмиз.

2027 йил 1 январь куни бошланадиган бўлажак цикл давомида умумий ҳисобда аъзо ассоциацияларнинг ҳар бири ушбу таклиф доирасида 40 миллион долларгача маблағ олиши мумкин", – дейилади Инфантино мактубида.

Ташқи инвесторлар билан битимга қарши чиқаётган манбалар Инфантинонинг молиялаштиришни кўпайтириш бўйича таклифини "соф пора" деб атади.