Инфантинонинг ўрнини эгаллаши мумкин бўлган беш асосий номзод айтилди. Улар орасида икки осиёлик ҳам бор!

Даъвогарлар қаторидан қуйидагилар ўрин олди:

Нассер Аль-Хелаифи, ПСЖ президенти, Европа футбол клублари кенгаши (EFC) раиси;

Виктор Монтальяни, ФИФА вице-президенти, Шимолий ва Марказий Америка ҳамда Кариб ҳавзаси мамлакатлари футбол конфедерацияси (КОНКАКАФ) президенти;

Александер Чеферин, УЕФА президенти;

Шейх Салмон бин Иброҳим Ал-Халифа, Осиё футбол конфедерацияси (АФК) президенти;

Патрис Моцепе, Африка футбол конфедерацияси (CAF) президенти.

Таъкидланишича, Монтальяни энг мантиқий вариант ҳисобланади, чунки у ФИФА Кенгаши вице-президенти сифатида ишлайди ва ташкилотнинг ички фаолияти билан яхши таниш.

Номзодлардан ариза қабул қилишнинг охирги муддати — 2026 йил 18 ноябрь. Даъвогар номзодини фақат миллий футбол ассоциацияси илгари суриши мумкин. Бунда номзод камида бешта федерациянинг қўллаб-қувватлашига эришиши керак. ФИФА президенти сайловининг ўзи 2027 йил 18 март куни Рабатда (Марокаш) бўлиб ўтиши режалаштирилган.