Инсайдер ўзбекистонлик боксчиларга оид муҳим янгиликлар билан ўртоқлашди

"Боксчилар менежери Алик Фролов Шаҳрам Ғиёсов, Баҳодир Жалолов ҳамда бир қатор ёш спортчилар борасида сўнгги маълумотларни берди.

Шаҳрам Ғиёсов Ролли Ромеро билан чемпионлик жангини кутмоқда. WBA ва PBC (Premier Boxing Championship) ўртасидаги музокаралар анча вақтдан бери давом этмоқда. Агар келишувга эришилмаса, яқин орада жанг учун молиявий тендер эълон қилиниши кутилмоқда.

Отабек Холматов тез орада рингга қайтади. У билан расмий менежмент шартномаси бўлмаса-да, Жоэль Диас мураббий сифатида ёрдам бермоқда. Фролов унинг ажойиб жангчи эканини таъкидлади ва тез орада янгиликлар бўлишини айтди.

Жавоҳир Умматалиев ва Асадхўжа Мўйдинхўжаев борасида. Уларнинг иккинчи профессионал жанглари аллақачон режалаштирилган ва тез орада эълон қилинади. Жавоҳирни тез кўтариш режалаштирилмаган — у йилига 4-5 та жанг ва ҳаваскор турнирлар орқали босқичма-босқич ривожлантирилади.

Баҳодир Жалолов. Икки карра Олимпия чемпиони учун аниқ ва пухта режа бор. Агар ҳаммаси режа бўйича кетса, Баҳодир бу йил жуда кучли ва қулай позицияда бўлади", дейилади хабарда.