ИНТЕРВЬЮ. Отабек Холматов Top Rank билан фаолияти якунигача ҳамкорлик қилиши, оёғидаги жароҳати, Қозоғистонда жанг қилиши ва чемпионлик жангига қанчалик яқин экани ҳақида гапирди

Бу сафарги суҳбатда Отабек Top Rank билан келишуви, Раймонд Форд билан жанги The Ring томонидан эътироф этилгани, бўлажак жангига тайёргарликлари ва эҳтимолий чемпионлик жанги ҳақида тўхталиб ўтди.

Маълумот учун, Холматов 5 апрель куни Қозоғистоннинг Астана шаҳрида Top Rank промоутерлик компанияси томонидан ташкил этиладиган бокс оқшоми доирасида филиппинлик боксчи Жейсон Каной билан жанг қилади.

— Аввалги суҳбатимизда Top Rank билан келишувга эришганингиз ҳақида айтгандингиз. Бу мазкур келишув бўйича илк жангми? Шартнома нечта жанг учун тузилган?

"Ҳа, Top Rank билан шартнома қилинган. Боксда яна қанча жанг ўтказишимни билмайман, лекин қанча давом эттирсам ҳам, насиб бўлса, охиригача Top Rank билан ҳамкорликда ишлаймиз".

— Йил бошида сизнинг Раймонд Форд билан жангингиз The Ring талқинига кўра, "2024 йилнинг энг яхши жанги" деб топилди. Лекин сиз The Ring тақдирлаш маросимида кўринмадингиз, сизга улар соврин юборишдими?

"Шундай, мени иштирокимдаги баҳс "йилнинг энг яхши жанги" деб топилди. Англияга мени ҳам чақиришган эди, лекин мени визам чиқмай қолди. Улгурмай қолдик, виза ўхшамади. Шунинг учун мен бора олмадим. Йўқ, менга ҳеч нарса юборишмади", дейди Сирдарёда туғилган проф боксчи.

Бўлажак жангингиз учун АҚШда тайёргарлик олиб бордингиз, океан ортидаги машғулотлар қандай ўтди? саволига эса Отабек: "Ҳа, Алҳамдулиллаҳ, АҚШнинг Индио шаҳрида жангимга тайёргарлик кўрдим. Ҳаммаси жуда яхши ўтди", дея жавоб қайтарди.

— Айни дамда ўз вазнингизда WBA рейтингида учинчи ўриндасиз. Сиз ўзингизни титул жангига қанчалик яқинман, деб ўйлайсиз?

"Алҳамдулиллаҳ, ҳозирда WBA камари учун учинчи даъвогар бўлиб турибман. 5 апрель куни ғалаба қозонсам, кейинги жангим Eliminator (даъвогарлик) мақомида бўлади. Насиб бўлса, Ин Ша Аллоҳ учинчиси Жаҳон чемпионлигига. Шунга ҳаракат қиляпмиз. Меҳнатдан тўхташ йўқ. Насиб қилса, албатта Ўзбекистонимизга чемпионлик камарини олиб бораман. Мухлисларимиз фақатгина дуо қилиб туришса бўлди".

Отабек шунингдек, Қозоғистонда рингга кўтарилиши борасида фикр билдирди:

"Қозоғистондаги жангим аниқ бўлди, Худога шукур. Оёғимдаги операциядан кейинги бир йиллик танаффусдан сўнг анча яхшиман, оёғимда ҳеч қандай оғриқлар йўқ. Жароҳатимдан тўлиқ фориғ бўлдим. Жисмоний ҳолатимни тиклаб олдим. Жангга тайёрмиз. Худо хоҳласа, Қозоғистонда чиройли жанг кўрсатиб, ғалаба қозонишга ҳаракат қиламиз", дея ўз фикрларини билдириб ўтди Холматов.

Диёрбек Мавлонов суҳбатлашди