Ислам Махачев хатосини тан олди

Махачев кеча ўз интервьюсида ўта енгил вазн тоифаси чемпиони Мераб Двалишвилини дунёнинг энг кучли лигасининг энг яхши жангчилари қаторига қўшмаган эди. Ислам P4P, вазн тоифасидан қатъи назар UFC`нинг энг кучли бешлигини тузишда хатога йўл қўйганини тан олди.

"Мераб Двалишвилини унутибман. У энг яхшилардан бири", - деб ёзди россиялик жангчи ижтимоий тармоқдаги саҳифасида.

Махачев стример Эйдин Росс билан яқинда бўлиб ўтган суҳбат чоғида вазн тоифасидан қатъи назар ташкилотнинг энг яхши беш жангчисини санаб ўтганди. У рўйхатга ўзидан ташқари Александр Пантожа, Том Аспиналл, Александр Волкановски ва Илия Топурияни киритган эди.

Ислам Мераб Двалишвилини ҳам қўшиб, аввалроқ ўзи айтган жангчилардан қайси бири рўйхатни тарк этганига аниқлик киритмаган.