Исламни октагонга чорлаган Царукян UFC енгил вазнлилар рейтингида Топ-5`га кириб олди

Арман якшанба тонгида америкалик Бенил Дариушни биринчи раунднинг 64-сониясидаёқ нокаутга учратган эди. Ушбу ғалабаси эвазига у UFC енгил вазнлилар рейтингида тўрт поғонага кўтарилиб, тўртинчи ўринга жойлашди. Бенил эса аксинча, тўртинчи ўриндан еттинчи поғонага пастлади. 

Шунингдек, Царукяннинг ғалабаси Рафаэль Физиевнинг рейтингдаги ўрнига ҳам таъсир ўтказди. "Атаман" аввалги ўрнидан бир поғонага пастлади. Якшанба тонгида Бобби Гринни биринчи раунднинг ўзида нокаутга учратган Жэлин Тернер Топ-10`таликка кириб олди. 

Рейтингнинг Топ учталигида ҳеч қандай ўзгариш кузатилмади. Бразилиялик собиқ чемпион Чарльз Оливейра биринчи ўринни сақлаб қолди. Америкалик Жастин Гетжи ва Дастин Порье мос равишда иккинчи ҳамда учинчи ўринларни банд этишган. Ислам Махачев вазн чемпиони бўлиб турибди. Арман Царукян якшанба кунги жангидан кейин Махачевга қарши октагонга чиқишга тайёр эканини маълум қилган эди.