Ислом бирдамлиги спорт федерациясининг Бош ассамблеяси йиғилиши ўтказилди

Унда Осиё, Африка ва Eвропанинг ташкилотга аъзо 56 та мамлакати миллий олимпия қўмиталари вакиллари иштирок этди. Анжуманда Ўзбекистон Миллий олимпия қўмитаси Бош котиби Ойбек Касимов қатнашди.

Муборак Қуръон тиловати билан бошланган анжуман аввалида ISSF президенти, Саудия Арабистони шаҳзодаси Абдулазиз бин Турки ал-Файсал сўзга чиқиб, Ислом бирдамлиги ўйинлари мусулмон оламида ўзаро алоқаларни мустаҳкамлашга хизмат қилишини алоҳида таъкидлади.

“Ислом бирдамлиги ўйинлари айни мақсадлар ила 2005-йилда ташкил этилган эди. Коронавирус пандемияси туфайли бироз кечикиб бўлса ҳам ушбу мусобақаларни ўтказаётганимиздан жуда хурсандмиз”, - деди ISSF президенти.

V Ислом бирдамлиги ўйинлари ташкилий қўмитаси раиси, Туркия ёшлар ва спорт вазири Меҳмет Касапоглу ўз сўзида Коньяда мусобақага кўрилган тайёргарлик жараёнлари ҳақида гапирди. Унинг айтишича, ўйинларни ўтказиш учун Конья шаҳридаги мавжуд спорт иншоотлари қайта таъмирланди, қатор янги спорт мажмуалари бунёд этилди. Ислом бирдамлиги ўйинларини юқори савияда ўтказиш учун барча имкониятлар мавжуд.

Бош ассамблея йиғилишида 2025 йил Камерун мезбонлигида ўтажак ўйинлар борасида ҳам мутасаддиларнинг ҳисоботлари тингланди.