Исраэль Адесаньянинг эҳтимолий рақиби ва жанг санаси маълум қилинди

Катта эҳтимол билан унинг рақиби Шон Стрикленд - Дрикус Дю Плесси чемпионлик жанги ғолиби бўлади. Бу маълумотни ўрта ва яримоғир вазн тоифаларида собиқ UFC чемпиони Чел Соннен тасдиқламоқда.

"Стрикленд - Дю Плесси жангининг эртароқ ўтказилишига асосий сабаб ҳам аслида шу. Ушбу жанг ғолиби Иззи билан UFC 300 турнирида тўқнаш келади. Тўғри, бу ҳали тасдиқланмаган хабар. Лекин менга етиб келган маълумотларга қараганда, воқеалар ривожи айнан мен айтгандек бўлади. Балки Адесаньянинг ўзи тез орада "Иккингиздан бирингизни апрель ойида кутаман" деб қолар", - деди "Америкалик гангстер" ўзининг навбатдаги подкаст эфирида. 

Эслатиб ўтамиз, Исраэль Адесанья шу йилнинг сентябрь ойида Шон Стриклендга ютқазиб, камарини бой берганди. Шундан кейин у маълум муддат танаффус олишини эълон қилган эди. Стрикленд - Дю Плесси жанги 20 январь куни Канаданинг Торонто шаҳрида ўтказиладиган UFC 297 турнирининг асосий тўқнашуви бўлади. UFC 300 турнири эса 13 апрель куни АҚШнинг Лас-Вегас шаҳрида ташкил этилади.