Исроил Гран-приси. Медаллар жамғариш бўйича ким пешқадам?

Йилнинг дастлабки нуфузли мусобақасида кеча биринчи кунги баҳслар ўтказилди ва жами 5та вазн тоифасида ғолиб ҳамда совриндорлар номи маълум бўлди. 

Ҳозирча биринчи кунги натижаларга кўра, медаллар жамғариш бўйича Исроил терма жамоаси пешқадамлик қиляпти. Мезбонлар 2та олтин, 1та кумуш медалини қўлга киритишди. Улар ҳисобида биттадан бешинчи ва еттинчи ўринлар ҳам бор. 

Бельгия, Италия ва Косово терма жамоалари биттадан олтин медалга эга бўлишди. Украинада 2та кумуш, Россияда 1та кумуш, 2та бронза, Голландияда 1та кумуш медали бор. 

Франция, Буюк Британия, Венгрия, Болгария, Испания, Бразилия, Руминия ва Швейцария терма жамоалари ҳозирча биттадан бронза медалига эга бўлиб туришибди. Жами 15та давлат дзюдочилари камида битта медални қўлга киритиб улгуришди. 

Биттадан бешинчи ўринга эга Озарбайжон, Португалия, Словения ҳамда Ўзбекистон терма жамоалари ҳозирча 16-19 -ўринларни банд этишган ва ўйлаймизки, бугунги натижалардан сўнг терма жамоамиз медаллар жамғариш бўйича ўз ўрнини сезиларли даражада яхшилаб олади.

Маълумот учун, 2019 йилнинг дастлабки нуфузли мусобақаси ҳисобланган Исроил Гран-присининг умумий мукофот жамғармаси 100 000 АҚШ долларини ташкил қилади. Ғолиб дзюдочилар пул мукофотидан ташқари Токио-2020 Олимпиадаси йўлидаги муҳим 700 рейтинг очкосини ўз ҳисобларига қўшиб қўйишади.