Исроил Гран-приси. Мезбонлар медаллар жамғариш бўйича якка пешқадам!

Ушбу мусобақада сайёрамизнинг 5та қитъаси 54 давлатидан 400 нафарга яқин полвонлар иштирок этди. Улар орасида 18 нафар дзюдочимиз ҳам медаллар ҳамда Токио-2020 Олимпиадасининг муҳим рейтинг очколари учун баҳс олиб боришди. 

Медаллар жамғариш бўйича исроиллик дзюдочиларга тенг келадиган рақиб топилмади. Мезбонлар жами 4та олтин, 2та кумуш, битта бронза медали билан норасмий умумжамоа ҳисобида биринчи ўринни эгаллашди. Улар ҳисобида яна биттадан бешинчи ва еттинчи ўринлар ҳам бор. 

Италия ва Франция терма жамоалари 2тадан олтин медални қўлга киритишди. Кумуш медаллар сони 3та бўлгани учун италияликлар иккинчи поғонадан жой олишди. Косово, Озарбайжон, Беларусь, Словения, Бельгия ва Швеция терма жамоалари бир нафардан Гран-при чемпионига эга бўлишди. Жами 23 давлат спортчиларига уйга камида битта бронза медали билан қайтиш насиб этди. 

Ўн саккиз нафар спортчи билан иштирок этган Ўзбекистон терма жамоаси иккита бешинчи ва битта еттинчи ўрин билан умумжамоа ҳисобида 24-поғонадан жой олди. Йигирма битта мамлакат дзюдочилари биронта ҳам ўринга эга бўлишмади.