01 окт 14:50
Янгиликлар

Теннис

Истомин Алмати турниридаги илк учрашувини ўтказди

Қозоғистоннинг Алмати шаҳрида теннис бўйича “Челленжер” туркумига кирувчи турнирнинг асосий тўр баҳслари бошланди.

Соврин жамғармаси 50 000 АҚШ долларини ташкил қилувчи ушбу турнирда ҳамюртимиз Денис Истомин ҳам иштирок этяпти ва табиийки, у мусобақанинг биринчи рақамли теннисчиси!

Мамлакатимизнинг биринчи рақамли теннисчиси илк даврада португалиялик Фредерику Сильвага қарши кортга чиқди. Бу икки теннисчи шу пайтгача бир маротаба тўқнаш келишганди. Ўтган йили ўтказилган ўша учрашувда Сильва ғалаба қозонган эди.

Бу сафар Денис бир йил аввалги мағлубият учун реванш олди. Бир соату 23 дақиқа давом этган баҳсда Истомин 6:3, 7:5 ҳисобида зафар қучиб, иккинчи даврага йўл олди. Ҳамюртимиз дунё рейтингида 103, Фредерику эса 291-ўринни эгаллаб турибди.