Истоминнинг финал остонасидаги рақиби дунёнинг собиқ 24-ракеткаси!

Соврин жамғармаси 50 000 АҚШ долларини ташкил қилувчи ушбу турнирда ҳамюртимиз Денис Истомин биринчи рақам остида ҳаракат қиляпти. Осиё ўйинлари ғолиби Алматида ҳам ғолибона юришини давом эттирмоқда. 

У бугун чорак финал учрашувида турнирнинг еттинчи ракеткаси сифатида таснифланган сербиялик Миомир Кецмановични 6:3, 6:4 ҳисобида мағлуб этганди. Бундан бир неча дақиқа аввал унинг ярим финалдаги рақиби маълум бўлди. 

Истомин финал чиптаси учун Лукаш Росолга қарши кортга чиқади. Чехиялик 33 ёшли теннисчи чорак финалда германиялик Тобиас Камкени 6:1, 6:4 ҳисобида таслим этди.

Таққослаш учун, Денис Истомин дунё рейтингида 103, Лукаш Росол эса 177-ўринни эгаллаб турибди. Теннисчилар шу кунгача ўзаро турнирларда беш маротаба тўқнаш келишган. Учрашувларнинг тўрттасида Лукаш, фақат биттасида Денис зафар қучган.