Жаҳон чемпионати олдидан: Ўзбек таэквондочилари бунгача кадетлар ўртасидаги ЖЧларда қандай иштирок этишган?

Кадетлар ўртасидаги дастлабки Жаҳон чемпионати 2013 йилда Озарбайжон пойтахти Боку шаҳрида ўтказилган. Тарихий мусобақада Ўзбекистон терма жамоаси битта медални қўлга киритган. +65 килограмм вазн тоифасида таэквондочимиз Исломжон Адҳамов бронза медалига эга чиқиб Ўзбекистон тарихидан ўрин олган. 

Иккинчи Жаҳон чемпионатига эса 2015 йилда Жанубий Кореянинг Мужу шаҳри мезбонлик қилган. Бу сафар спортчиларимиз юртимизга иккита бронза медали билан қайтишган. -33 кг вазн тоифасида Жасурбек Зокиров ва +65 кг вазн тоифасида яна ўша Исломжон Адҳамов Ўзбекистон терма жамоасига медаллар келтиришганди. Шу тариқа, Адҳамов кетма-кет иккита Жаҳон чемпионатида медаль олган биринчи ўзбекистонлик таэквондочи бўлган .

Икки йил муқаддам Мисрнинг Шарм Эл Шейх шаҳрида ҳисоб бўйича III Жаҳон чемпионати ўтказилган. Бу сафар таэквондочи кадетларимиз олдинги натижани икки баравар яхшилашган ва 4та бронза медални қўлга киритишган. Эътиборлиси ўша Жаҳон чемпионатида Ўзбекистон илк бор қизлар ўртасидаги мусобақада ҳам совриндор бўлган. 

2017 йилги Жаҳон чемпионатида Муниса Каримова (-29 кг), Умидахон Ҳасанова (-47 кг), Даниил Ким (-33 кг) ва Амирбек Тўраев (-37 кг) медалларга эга чиқишган.   

Тошкентда ўтказиладиган жаҳон чемпионатида спортчилар 20та вазн тоифасида (ўғил болалар 10 та, қизлар 10 та) кураш олиб боришади. Ўзбекистон терма жамоаси ушбу Жаҳон чемпионатида тўлиқ таркибда иштирок этади. Барча спортчиларимизга омад тилаймиз!

Ўзбекистон таэквондо WTF ассоциацияси матбуот хизмати