Жаҳон чемпионатининг илк кунидаги энг яхши натижамиз 5-ўрин бўлди

Ушбу нуфузли мусобақада Ўзбекистон ёшлар терма жамоаси деярли тўлиқ (биргина +78 кг вазнда биздан спортчи қиз йўқ) таркиб билан иштирок этяпти. Эркаклар ўртасидаги +100 кг, аёлларда эса -57 кг вазнда Ўзбекистондан икки нафардан дзюдочи татамига чиқади.  

Жаҳон чемпионатида ўғил болалар -60, -66, -73, -81, -90, -100, +100 кг, қизлар эса -48, -52, -57, -63, -70, -78 ҳамда +78 кг вазн тоифаларида татамига чиқишади. Кеча жаҳон чемпионатига қуръа ташлаш маросими бўлиб ўтди. 

Кеча жаҳон чемпионатининг биринчи кунида жами 4 та вазн тоифасида медаллар учун беллашувлар ташкил этилди. Ўзбекистонлик дзюдочилардан энг яхши натижага -66 кг вазн тоифасида юртимиз шарафини ҳимоя қилган Дилшодбек Йўлдошев эришди. У бронза медали учун кечган баҳсда аввалига қозоғистонлик Ермек Амангелдини мағлуб этди. Кейин эса бразилиялик Марселиньога ютқазиб қўйди ва 5-ўрин билан кифояланди. 

-60 кг вазндаги дзюдочимиз Бобур Баджиев илк босқичда япониялик Кен Суемацуга, -48 кг вазн тоифасидаги вакиламиз Юляна Маскетбаева марокашлик Чаймай Эддинарига имкониятни бой берди. -52 кг вазндаги Сита Қадамбоева венгриялик Тимеа Кардошдан устун келди. Лекин учинчи даврада мўғулистонлик Сосорбарам Лхагвасуренга ютқазиб қўйди.