Жаҳонободда белбоғли кураш бўйича очиқ турнир ўтказилди

9 май — Хотира ва қадрлаш куни муносабати билан ташкил этилган ушбу турнир шу ҳудудда яшаб ўтган номдор полвонлар, мураббий-устозлар хотирасига бағишланди.  

Мусобақа доирасида турнирнинг очилиш маросими ўтказилди. Унда Риштон тумани ҳокими Баҳодиржон Холиқов спортчиларни қутлаб, уларга омад тилади. 

Риштон тумани ҳокимлиги, туман прокуратураси, Фарғона вилоят спорт бошқармаси, Ўзбекистон белбоғли кураш федерацияси, Федерациянинг Фарғона вилоят бўлими ҳамда ҳомийлар ҳамкорлигида ўтган мазкур очиқ турнирда юртимиз полвонларидан ташқари Тожикистон ва Қирғиз Республикасидан ҳам спортчилар иштирок этди.

Шу куни кўп сонли белбоғли кураш мухлислари полвонларнинг ўзаро шиддатли беллашувларини томоша қилиб очиғи, яйради. Фахрий полвонларга ҳурмат ва эҳтиром кўрсатилиб, эсдалик совғалари улашилди. 

Шунингдек, Жаҳонобод қишлоғида яшаб, белбоғли кураш бўйича ном қозонган марҳум полвонлар Аҳмаджон Эгамов, Абдуқодир Жумабоев, Азим Қўлдошев, Орифжон Собиров, Муллаҳожи Султонов, Беғамжон Эрматов, Бекзодбек Норматов, Абдулла Мамаюсуповлар номи ёдга олинди.  

Турнир ташкилотчилардан Фарғона вилояти белбоғли кураш федерацияси ижрочи директори, халқаро тоифадаги ҳакам Мираншоҳ Рўзиев ҳамда Зоҳидбек полвон Исмоилов бошчилигидаги ҳакамлар полвонларнинг курашини баҳолаб боришди.

Сайил кураши тарзида ўтказилган беллашувларда Зайлобиддин Ортиқов, Ҳусниддин Рўзиев, Аъзамжон Анваржонов, Бобур Тўхтасинов каби ўнлаб номдор полвонлар бор маҳоратларини намойиш этишди. Айнан ушбу полвонларнинг ўзаро беллашувлари анъанавий турнирга янада жозиба бағишлади. 

Турнирда ғолибликка эришган полвонларга ташкилотчилар томонидан қимматбаҳо эсдалик совғалари топширилди. 

Илҳом РАҲМОНОВ тайёрлади