Жанг қилганига эндигина 10 кун бўлган Санжар Зокиров яна ўз ишига қайтмоқда. Бу сафарги рақиб жиддий!

ONE FC матбуот хизмати тақдим этган хабарга кўра, 21 ёшли Зокиров 5 апрель куни Таиланднинг Бангкок шаҳридаги Lumpinee Stadim'да ташкил этиладиган ONE Fight Night 30 турнирида иштирок этади. 

"Торнадо"га ўша куни Жанубий Африка Республикаси вакили Боканг Масуньяне рақиб бўлади. Зокиров минимал вазн тоифасида ONE FC рейтингида бешинчи ўринни эгаллаб турган бўлса, Масуньяне учинчи поғонада қайд этилган. 

Санжар фаолияти давомида ҳозирга қадар 12 та жанг ўтказиб, уларнинг барчасида ғалаба қозонган. Боканг ҳисобида эса 10 та ғалаба ва 2 мағлубият бор. Африкалик спортчи икки мағлубиятини ONE FC рейтингида иккинчи ўриндаги Жарред Брукс ва учинчи поғонадаги Мансур Малачиевдан қабул қилиб олганди.

Эслатиб ўтиш жоиз, Санжар 8 март куни ONE Fight Night 29 турнири доирасида индонезиялик Эко Рони Сапутра билан жанг қилиб, муддатидан олдин ғалаба қозонган эди.