Жисмоний тарбия фани ўқитувчилари малака тоифасини олиш учун тест топширмаслиги ростми?

АОКА ҳузуридаги штабда ўтказилган брифингда Таълим сифатини назорат қилиш давлат инспекцияси Матбуот хизмати раҳбари Феруза Мадраҳимова ушбу саволга жавоб берди:

Вазирлар Маҳкамасининг 2020 йил 20 февралдаги 106-сон қарори билан юқори меҳнат самарадорлигига эришаётган жисмоний тарбия фани ўқитувчиларини муносиб рағбатлантиришни ташкил этиш мақсадида бир қатор қарорларига ўзгартириш ва қўшимчалар киритилган эди. 

Жумладан, Мактабгача, умумий ўрта, ўрта махсус, касб-ҳунар ва мактабдан ташқари давлат таълим муассасалари педагог кадрларини аттестациядан ўтказиш тартиби тўғрисидаги низомга киритилган қўшимчага кўра, таълим муассасаларининг қуйидаги жисмоний тарбия фани ўқитувчиларига малака тоифаси (лавозим) тўғридан-тўғри (аттестациядан ўтказилмасдан) берилади: 

- туман (шаҳар) миқёсидаги спорт мусобақаларининг 1-ўрин совриндорларини тайёрлаганларга – иккинчи малака тоифаси (катта ўқитувчи лавозими); 

- вилоят миқёсидаги спорт мусобақаларининг 1-ўрин совриндорларини тайёрлаганларга – биринчи малака тоифаси (етакчи ўқитувчи лавозими); 

- халқаро ҳамда республика миқёсидаги спорт мусобақаларининг 1, 2 ва 3-ўрин совриндорларини тайёрлаганларга – олий малака тоифаси (бош ўқитувчи лавозими). 

Шунингдек, 2020 йилнинг 4 июнь куни тегишли вазирлик ва идораларнинг «Мактабгача, умумий ўрта, ўрта махсус, касб-ҳунар ва мактабдан ташқари давлат таълим муассасалари педагог кадрларининг аттестация натижаларини баҳолаш мезонларини тасдиқлаш ҳақида»ги қарорга ўзгартириш ва қўшимчалар киритиш тўғрисида” қарори Адлия вазирлигидан рўйхатдан ўтказилди. 

Унга кўра жисмоний тарбия фани ўқитувчилари малака тоифаси олиш ёки уни ҳимоя қилиш учун назарий ва амалий синовларда иштирок этишади. 

Назарий синов 4 та саволдан, амалий синов 4 та жисмоний машқдан иборат бўлади. Жисмоний машқлар – 100 метрга югуриш, жойидан туриб узунликка сакраш, эркаклар учун турникда тортилиш , гимнастика ўриндиғига таяниб, аёллар учун қўлларни букиш ва ёйиш, ётган ҳолда қўлларни бош орқасига қўйиб гавдани кўтаришдан иборат. Ҳар бир топшириқнинг белгиланган вақтда, тўлиқ, тўғри ва сифатли бажарилганлиги белгиланган нормативларга асосан баҳоланади.