Кадетлар терма жамоаси катта мураббийи Собир Назаралиев: "Тошкентдаги Жаҳон чемпионати энг юқори даражада ўтишига шубҳа йўқ"

Мазкур мусобақада Ўзбекистон терма жамоаси тўлиқ таркибда, 20 нафар спортчи билан иштирок этади. Биз терма жамоа катта мураббийи Собир Назаралиев билан бўлажак мусобақа олдидан суҳбатлашдик. 

- Тошкентда ўтадиган Жаҳон чемпионатида иштирок этадиган спортчилар қайси мусобақа орқали танлаб олинган? 

- Кадетлар терма жамоасини 2018 йил декабрь ойида бўлиб ўтган Ўзбекистон чемпионати асосида саралаб олганмиз. Ушбу терма жамоа мураббийлар штабида Жасур Бойқўзиев ва Музаффар Тожибоев ҳам фаолият олиб боришмоқда. Тошкентда бўладиган Жаҳон чемпионатига пухта тайёргарлик олиб бордик, уч босқичли машғулот жараёнларини ўтказдик. Тайёргарлик жуда яхши бўлди дея оламан. Барча спортчиларимиз мусобақага тайёр. 

- Тайёргарлик жараёнида қандайдир қийинчиликлар бўлдими? 

- Ташкилий жиҳатдан ҳеч қандай муаммо бўлгани йўқ. Кадетлар терма жамоаси аъзолари асосан 12-14 ёшли спортчилардан иборат. Бундай ёшдаги болаларнинг бўйи тез ўсади. Декабрь ойидаги Ўзбекистон чемпионатидан кейин кўплаб шогирдларимизнинг бўйи ўсди ва ўз-ўзидан вазни ҳам кўпайди. Шу борада бироз қийинчилик бўлди, аммо Жаҳон чемпионатига қадар барча муаммо бартараф этилади. 

- Таркибимиздаги қайси спортчиларда медаллар учун имконият юқори деб ўйлайсиз? 

- Бундай даражадаги мусобақа Ўзбекистонда биринчи марта ўтказилмоқда. Бежизга ўз уйингда деворлар ҳам ёрдам беради деб айтишмайди. Таркибимизаги барча спортчида олтин медаль учун имконият бор. Сабаби бугунги кунда шогирдларимиз яхши спорт формасида бўлиб туришибди. Барча спортчилар, шу жумладан терма жамоа мураббийлар штаби энг яхши натижалар қайд этилиши учун қўлимиздан келганича ҳаракат қиламиз.  

- Мусобақага тайёргарликнинг ташкилий томонларига қандай баҳо берасиз? 

- Ўзбекистон таэквондо WTF ассоциацияси раҳбари Шерзод Тошматов бошчилигида Жаҳон чемпионатига тайёргарликнинг ташкилий ишлари олий даражада олиб борилмоқда десам муболаға бўлмайди. Ушбу инсон қанчалик профессионал эканлигини барчамиз биламиз. Ўз вақтида Шерзод Тошматов бошчилигида бокс мусобақалари юқори савияда ўтказилганидан хабардорсиз албатта. Таэквондочи кадетлар ўртасидаги Жаҳон чемпионати ҳам энг юқори даражада ўтишига шубҳа йўқ.