Камару Усман қайтмоқда, нигериялик "даҳшат" рақибни ҳам эълон қилди

Нигериялик аралаш яккакураш устаси австралиялик Жек Делла Маддаленага қарши жанг ўтказиш истагида эканини очиқлади. Ушбу жангнинг 2025 йил 8 февраль куни Австралиянинг Сидней шаҳрида ташкил этиладиган UFC 312 турнири доирасида ўтказилиши кутилмоқда. 

"Унинг мен билан жанг қилмоқчи бўлаётганини эшитдим. Жек бир нечта интервьюларида бу ҳақда гапирганини ҳам кўрдим. Мен буни олқишлайман. Агар унинг ўрнини бўлганимда мен ҳам худди шундай йўл тутардим. Дивизиондаги энг катта жангга эга бўлиши учун ҳам у шундай қиляпти. Мен орқали у юқори даражага кўтарилмоқчи. Вазнимиздаги жуда кўп йигитлардан ўтдим. Сен ҳам уларнинг бири бўласан. Фақат биргина муаммо бор - февралга икки ой вақт қолди. Тайёргарлик кўришим учун бу муддат етармикан?", - дея MainEventTV каналига интервью берган Усман.

Маълумот учун, Камару Усман сўнгги жангини 2023 йилнинг октябрь ойида Хамзат Чимаевга қарши ўрта вазн тоифасида ўтказиб, очколар ҳисобига кўра имкониятни бой бериб қўйганди. Ўшанда у қисқа муддатда жангни қабул қилган эди. 

Жек Делла Маддалена эса UFC`да еттита ғалабали серия билан келмоқда. Шу йилнинг март ойида у Гилберт Бернсни учинчи раундда нокаутга учатганди. Айни пайтда Камару Усман яримўрта вазн тоифаси рейтингида учинчи, Жек Делла Маддалена эса тўртинчи ўринни банд этган.