Камавинга ортидан "Реал"нинг яна бир асосий футболчиси бир ойга сафдан чиқди

Мадриднинг "Реал" клуби ярим ҳимоячиси Жуд Беллингем Мадрид жамоаси машғулотларини оқсоқланган ҳолда тарк этди. Бу ҳақда журналист Эду Агирре хабар бермоқда.

Кейинроқ бу маълумотни "қаймоқранглилар" бош мураббийи Карло Анчелотти тасдиқлади. Хабарларда айтилишича, футболчи жароҳат сабаб 3-4 ҳафтага сафдан чиққан. 

"Беллингем машғулотларда зарба қабул қилиб олди. Унинг аҳволи ўрганилмоқда", – деди италиялик мутахассис.

Ўз навбатида, "The Athletic" нашри Беллингемнинг жароҳати жиддий эмаслигини ёзди. 25 август куни "Реал" Испания чемпионати 2-тури доирасида ўз майдонида "Вальядолид"ни қабул қилади.