Канело - Бивол жанги барбод бўлиш арафасида: россиялик Украинадаги вазият туфайли четлатилиши мумкин — буни ака-ука Кличколар хоҳлаяпти

Сўнгги ҳафталар рус спорти учун қийин кечгани билан ажралиб турибди: кўпгина спортчилар санкциялар остида қолди, халқаро мусобақалар эса бирин-кетин Россиядан юз ўгирмоқда. Афтидан, инқироз жанг санъатлари оламига бошқа спорт турларига қараганда камроқ таъсир ўтказган кўринади: UFC раҳбари Дана Уайт россиялик спортчилар билан ишлашни хоҳлаётганини очиқ-ойдин айтди, боксда эса аллақачон юқори даражадаги жанг — мағлубият нималигини билмай келаётган Дмитрий Бивол ва Сауль Альварес жанги афишаси эълон қилинди.

Россиялик Дмитрий Бивол яримоғир вазн тоифасида WBA камари соҳиби, жанг айнан унинг камари учун ўтказилмоқда. Канело билан жанг Биволнинг фаолиятида бурилиш нуқтаси бўлиши керак: мексикалик боксчи Тhe Ring версиясига кўра жаҳонда тенгсиз, бундан ташқари, у юқори даражадаги жангларда қатнашиш ва иккинчи бор мутлақ чемпионликни қўлга киритиш мақсадида янги вазн тоифасига ўтмоқда. Жанг аллақачон эълон қилиниб, боксчилар "стердаун"ни ушлаб туришган бўлса-да, Бивол-Альварес жанги ўтказилишига ишонч йўқ.

Гап шундаки, WBA аллақачон рус боксчиларига қарши уларни рейтинглардан чиқариб ташлаган ҳолда санкция киритган. Жаҳон ҳамжамияти ҳам жангни бекор қилишга чақирмоқда, сабаби Бивол россиялик. Ака-ука Кличколар эса АҚШ ҳукуматидан Биволни жангдан четлатишни сўрамоқда.

Альварес-Бивол жанги анчадан буён муҳокама қилинмоқда: россиялик боксчи хавфли рақиб ҳисобланади, у ушбу жанг орқали фаолиятидаги энг катта гонорарини ишлаб олади

Канелонинг сўнгги жанглари кўпчилик мухлислар учун зерикарли бўлиб қолган эди. Ахир, жангдан аввал натижа деярли аниқ бўлар эди. Кўпчилик Калеб Плант ёки Билли Жо Сондерсни чемпионга рақобатчи деб билган. Янги вазнга ўтиш Альварес учун ҳеч бўлмаганда қандайдир синов бўлиши мумкин. Ахир, у олтмишта жангнинг бор йўғи биттасида мағлуб бўлган. Ягона мағлубият 2013 йилда Флойд Мейвезердан қабул қилиб олинган. Сўнгги пайтларда мексикалик боксчи ўрта вазндаги рақибларини мағлуб эта олмаётгандек туюлди.

2018 йилда Канело яримоғир вазн тоифасига ўтди ва россиялик Сергей Ковалёв билан жанг қилди. Канело ўз даражасидан анчагина пастлаган Ковалёвни 10-раундда нокаутга учратди. Визуал равишда ғалаба ишончлидек туюлди, аммо раунд якунланиши арафасида ҳакамлар карточкасидаги ҳисоб яқин эди. Ўн раунддан сўнг икки ҳакам жангни Альварес фойдасига — 96-94 кўринишида баҳолаган эди. Учинчи ҳакам эса жангни 95-95 кўринишида баҳолаган эди.

Янги вазнга ўтиш — ҳатто Канело каби боксчи учун ҳам хавф туғдиради. Кўпчилик Бивол мексикалик боксчи учун қийин рақиб бўлишига ишонади. Промоутер Эдди Хирн россиялик боксчи ўз рақибини хафа қилиши мумкинлигини истисно қилмади:

"Бу жангни Ковалёв билан бўлган жанг билан солиштирманг. Сергей тўғри ҳаёт кечирмаганини ҳамма билади. Жанг пайтида у аллақачон қариган эди ва ўз даражасида эмас эди. Ҳозир эса фаолиятининг чўққисида бўлган яримоғир вазнли жангчилар ҳақида гаплашяпмиз. Шундай экан яширмайман, жуда асабийлашяпман — бу Альварес учун ҳақиқатан ҳам хавфли жанг.

Ҳозирда Канело иккинчи ўрта вазндаги барча камарларга эгалик қилади, Бивол билан жанг унинг камарларини хавф остига қўяди. Альварес умумий тўртта вазн тоифасида чемпионга айланди, жумладан яримоғир вазн тоифасида. Бундай юлдуз боксчи билан жанг қилиш — Бивол учун бир умрлик имконият. Дмитрий фаолиятидаги энг катта гонорарни олишини айтиб ўтди — Альвареснинг деярли барча рақиблари билан шундай бўлади.

Бўлажак жангда Бивол аутсайдер, бунга шубҳа йўқ ва бу адолатли. Узоқ вақт давомида бошқа бир рус — Артур Бетербиев Канелога рақиблик қилди. Доғистоннинг мағлубиятсиз нокаутчиси Канелога Биволданда хавфлироқ рақиб ҳисобланган. Мисол учун, Геннадий Головкиннинг собиқ мураббийи (Альварес билан икки бор тўқнаш келган боксчи) Бетербиев Альваресни мағлуб эта олишига ишончи комил.

"Айни пайтда Альваресни тўхтатиши мумкин бўлган уч нафар боксчи бор деб ҳисоблайман. Улардан бири — Бетербиев. У кучли. Уни тўхтатиб қолиш учун калтак билан уриш керак. Қолган иккитаси — Бенавидес ва Головкин. Агар Головкин аввалги формасига қайтса, Саульни мағлуб эта олади", - дея таъкидлаган Абель Санчес.

Бивол санкциялар туфайли жангдан четлатилиши мумкин: Дмитрий Украинада тинчлик ўрнатилиши кераклиги ҳақида гапирди, аммо ака-ука Кличколар АҚШдан унинг жангларини тақиқлашни талаб қилмоқда

Бивол-Канело жанги узоқ вақтдан буён муҳокама қилинмоқда ва бутун дунё бўйлаб мухлислар жангни интиқ бўлиб кутишмоқда. Биволнинг ҳисобида профессионал боксда қўлга киритилган 19 ғалаба мавжуд, 2017 йилда у WBA камари соҳибига айланган. Аммо сўнгги воқеалардан келиб чиққан ҳолда, жанг бўлиб ўтишига ишонч йўқ — кўплаб россиялик спортчиларга санкция қўйилган. Дмитрий буни тушунади, у жанг ташкиллаштирилишига умид қилади:

"Ҳаммасини тушунаман, аммо бу содир бўлмаслигига ишонаман. Бу жангни ташкиллаштиришдан кўплаб манфаатдор томонлар борлигига ишонаман. Кўпчилик мухлислар бу жангни кўришни хоҳлайди. Ҳатто Альвареснинг мухлислари ҳам ўз кумирининг яримоғир вазн тоифасидаги чемпионлик учун курашини кўришга қизиқишади. Ўйлайманки, ҳаммаси яхши бўлади. WBA ҳам жангни ўтказишдан манфаатдор. Альвареснинг титул учун жанг қилиши ҳар қандай ташкилот учун манфаатлидир".

Канело-Бивол жанги 7 май санасида ўтказилиши режалаштирилган. Бир ҳафта аввал Сан-Диегода боксчилар матбуот анжуманини ўтказишди.

Украинадаги вазият туфайли промоутерларга босим кучайиб бормоқда. Кўпчилик Биволнинг жангини бекор қилишни талаб қилмоқда, чунки бошқа спорт турларида россияликлар аллақачон мусобақалардан четлаштирилиб бўлинган. Ака-ука Кличколар АҚШ ҳукуматидан россиялик боксчининг чиқишини тақиқлашни сўрамоқда. Шу билан бирга, Бивол ҳозирда жанг ўтказиладиган давлат — АҚШда машғулот олиб боряпти.

"Бу боксчи Америкада жанг қилиши тақиқланиши керак. Худди барча россиялик спортчиларга халқаро мусобақаларда қатнашиш тақиқланганидек", - дея таъкидлаган Виталий Кличко.

Шу билан бирга, Бивол — сиёсатдан йироқ, умуман камдан-кам ҳоллардагина гапирадиган, камтар спортчи. Аммо Украинадаги воқеалардан сўнг у мамлакатда тезроқ тинчлик ўрнатилиши кераклиги ҳақида гапирди.

"Украинада дўстларим кўп. Россияда ҳам дўстларим кўп. Оилам Россияда. Жуда қайғудаман. Ҳар куни уйқудан туриб, бунинг тугашига умид қиламан", - дея таъкидлаган Бивол. Кейинроқ Канело билан жангнинг сиёсатга ҳеч қандай даҳли йўқ эканига ишонтирди:

"Мен спорт билан шуғулланаман, сиёсат билан эмас. Бу икки боксчи ўртасидаги жанг, ва буни бошқа воқеаларга алоқаси бор деб ўйламайман. Ўйлайманки, кўпчилик бу фикрга қўшилади”.

Аммо пессимизм учун сабаб бор: камари хавф остида бўлган WBA — Бутунжаҳон бокс ассоциацияси аллақачон россияликларга қарши санкциялар киритган. 1 март санасида WBA вақтинчалик ўз рейтингларидан россия ва беларуслик боксчиларни чиқариб ташлади. Фақатгина амалдаги чемпионлар ўз мақомларини сақлаб қолишди — шу туфайли Бивол рейтингда қолди. Қолган россиялик боксчиларнинг исм-шарифлари аллақачон рўйҳатлардан ўчирилган. Шу билан бирга WBA Украинадаги вазиятга қараб, қарор ҳар ой қайта кўриб чиқилишини таъкидлади.

Биволнинг жанги ташкиллаштириладими, йўқми аниқ эмас — у машғулотларни давом эттиряпти, аммо уни ҳозирча фақатгина чемпионлик мақоми қутқариб турибди. Жамоатчилик босими ошиб боряпти, WBA эса аллақачон россияликларга қарши санкция киритишга тайёрлигини кўрсатган. Биволга жанг қилишга рухсат берилган тақдирда ҳам рингда Россия байроғини кўришимиз ёки мадҳиясини эшитишимиз даргумон.

Бироқ, бокс — бу индивидуал спорт туридир, боксчилар терма жамоа аъзоси эмас (олимпиадада бўлгани каби). Шундай экан, миллий рамзларнинг йўқлиги муаммо эмасдек. Яна бир мамнун қиладигани, Бивол аллақачон АҚШда, энди унда мамлакатга кириши учун визалар муаммоси бўлмайди.