Каратэ. А сериядаги энг яхши натижамиз 9-ўрин, Қозоғистон 4та медал олди

Зальцбург татамиларида Ўзбекистон терма жамоаси аъзолари ҳам ката ва кумитэ баҳсларида ўз имкониятларини синовдан ўтказишди. Австриядаги турнир Токио Олимпиадасига муҳим лицензион очко бериши билан аҳамиятли эди. 

Афсуски, бу галги мусобақадан ҳам спортчиларимиз медалсиз қайтишди. Бу сафар терма жамоа мураббийлари турнирга захира спортчиларини олиб боришди. Иккинчи таркиб вакиллари ўзлари учун билдирилган ишончни оқлашмади. 

Зальцбургдаги энг яхши натижамиз - 9-ўрин бўлди. -75 кг вазн тоифасида юртимиз шарафини ҳимоя қилган Жаҳоншоҳ Ибрагимов А Серия мусобақасида 9-ўринни эгаллади. -67 кг вазндаги юртдошимиз Асилбек Мадаминов 13-ўрин билан кифояланди. 

Эътиборга молик жиҳати шундаки, Қозоғистон терма жамоаси ушбу турнирда 4та медал (1та олтин, 3та бронза)ни қўлга киритди. -60 кг вазн тоифасида Дархан Ассадилов барча рақибларини енгиб, олтин медалга эга чиқди. Бу вазнда бизнинг биринчи рақамли спортчимиз Садриддин Сайматов ҳисобланади. Қайд этиш лозимки, қўшниларимиз мазкур турнирда 32 нафар спортчи билан иштирок этишди.

Турнирда иштирок этган каратэчиларимиз:

-60 кг: Шерзод Раҳимқулов ва Бекзод Туйғунов;

-67 кг: Асилбек Мадаминов ва Акмал Чориев;

-75 кг: Жаҳоншоҳ Ибрагимов;

-84 кг: Абдулазиз Атабаев;

-68 кг: Дилдор Аннадурдиева;

Ката: Ҳамдамжон Шодибеков