Каратэ WKF: “Istanbul Premier League” турнирида ҳамюртимиз финалга чиқди

Хабар берганимиздек, шу кунларда Туркиянинг Истанбул шаҳрида каратэ бўйича нуфузли “Istanbul Premier League” халқаро турнири бўлиб ўтмоқда. Унда Ўзбекистон терма жамоаси аъзолари ҳам иштирок этишяпти.

Қувонарлиси, кеча бўлиб ўтган саралаш баҳсларидан сўнг терма жамоамизнинг икки нафар вакили медаллар учун курашадиган бўлишди. Жумладан, дунёнинг 60та давлати вакиллари иштирок этаётган мусобақада ҳамюртимиз, -75 кг вазн тоифасида татамига тушган Достон Отаболаев финалга йўлланма олди. У олтин медаль учун кечадиган жангда италиялик Луижи Бусага қарши татамига тушади.

Яна бир вакилимиз, -60 кг вазн тоифасида иштирок этаётган Садриддин Сайматов эса бронза медали учун жанг қилади. Медаллар учун кечадиган жанглар 14 март санасига белгиланган.

“Istanbul Premier League” халқаро турнири финалчиси Достонбек Отаболаев ўз фикрлари билан ўртоқлашди:

«Ушбу ютуқларимиз замирида Жисмоний тарбия ва спорт вазирлиги ҳамда Ўзбекистон Миллий олимпия қўмитасининг хизматлари жуда катта. Уч ой мобайнида олиб борилган машғулотлар ўз маҳсулини берди. Мен бу муваффақиятим учун барча устозларимга, хусусан юртбошимиз Шавкат Мирзиёевга спортга қаратаётган юксак эътиборлари учун миннатдорлик билдираман ва албатта юртимиз байроғини юқори кўтаришга ҳаракат қиламан».

Биз эртага бўладиган жангларда ҳамюртларимиз Садриддин Сайматов ҳамда Достон Отаболаевга омад тилаймиз.