27 окт 12:56
Янгиликлар

Теннис

Каримов Шэньчжэндаги турнирда кортга чиқди

Хабар берганимиздек, бугун Хитойнинг Шэньчжэнь шаҳрида теннис бўйича “Челленжер” туркумига кирувчи турнирнинг саралаш баҳслари бошланди.

Соврин жамғармасин 75 000 АҚШ долларини ташкил этувчи ушбу мусобақада икки истеъдодли теннисчимиз - Жўрабек Каримов ва Ҳумоюн Султонов юртимиз спорт шарафини ҳимоя қилмоқда.

Султонов саралашнинг илк даврасида голландиялик Нистен Милиаанга қарши кортга чиқиб, рақибини ортиқча қийинчиликсиз 6/1, 6/2 ҳисобида таслим этгани ҳақида маълумот берган эдик. Жўрабек биринчи босқичдаёқ мағлубиятга учраб, ўз иштирокини тўхтатишга мажбур бўлди.

Аниқроғи, Каримов хорватиялик Матеж Сабановга қарши кечган учрашувни охирига етказа олмади. Биринчи сетни 6:2 ҳисобида ўз фойдасига ҳал қилган Жўрабек иккинчи сетнинг тўртинчи геймидан сўнг жароҳати сабаб курашни давом эттира олмаслигини билдирди.