Конья-2021. Баракали кун - кеча 12 та медаль қўлга киритилди + ФОТОГАЛЕРЕЯ

Кечаги кун беллашувлари Ўзбекистон спорт делегацияси учун баракали бўлди. Спортчиларимиз муросасиз кечган баҳсларда жами 12 та медални қўлга киритишди. Токио Олимпиадаси чемпиони Улуғбек Рашитов таэквондо, Ғуломжон Абдуллаев эса эркин кураш мусобақасида шоҳсупанинг энг юқори поғонасига кўтарилди. Улар шарафига Ўзбекистон мадҳияси янграб, байроғимиз баланд кўтарилди. 

Расулжон Абдураҳимов, Абдулла Азимов ва Ҳабибулло Эргашевдан иборат спорт гимнастикачиларимиз жамоавий баҳсларда кумуш медалга сазовор бўлишди. Абдураҳимов яккалик кўпкураш мусобақасида бронза медалини қўлга киритди. Пара сузиш мусобақасида қаҳрамонга айланган Азизбек Бойназаров бу сафар кумуш медалга эга чиқди. Бу унинг V Ислом бирдамлиги ўйинларидаги тўртинчи медали бўлди: 2 та олтин, 1 та кумуш, 1 та бронза.   

Шу тариқа, Ўзбекистон терма жамоаси бугунги кун баҳслари олдидан 56 давлат иштирок этаётган мусобақада 5 та олтин, 6 та кумуш, 12 та бронза, жами 23 та медаль билан умумжамоа ҳисобида 4-ўринни эгаллаб турибди. 

Туркия терма жамоаси ҳамон катта фарқ билан пешқадамлик қиляпти. Мезбонлар 22 та олтин, 18 та кумуш, 14 та бронза, жами 54 та медални қўлга киритиб улгуришди. Эрон 8 та олтин, 12 та кумуш, 7 та бронза медали билан 2-ўринга кўтарилиб олди. Қозоғистон делегацияси эса 6 та олтин, 1 та кумуш, 8 та бронза медали билан кучли учликка якун ясаган.